Salmo 100:1-5 ta para skirbi: Grita di alegria na Señor, mundo henter, Sirbi Señor cu goso, bin den su presencia cu cantamento gososo.
Reconoce cu Señor E ta Dios, E ta Esun cu a traha nos, y no ta nos a traha nos mes, nos ta Su pueblo, y e carnenan cu E ta pastoria.
Drenta Su portanan cu gradicimento, y Su plenchinan cu alabansa, dun’E gradicimento, bendiciona Su nomber. Pasobra Señor ta bon, Su misericordia ta pa semper, y su fieldad ta pa tur generacion. Pasobra e Yiu di hende no a bin pa wordo sirbi, ma pa sirbi,y pa duna Su bida como prijs pa hopi.
Ningun hende por sirbi dos shon, pasobra e lo odia esun, y stima e otro, of e ta leal na esun y desprecia e otro, Boso no por sirbi Dios y rikesa.( Mateo 6:24).
Hende no por sirbi Dios manera nan kier, pasobra sirbimento di Dios, ta bay exactamente segun Dios su boluntad, no un dia si, un dia no, ora bo kier, of awe bo tin mal beis, of awe bo no tin tempo, tur esey ta carnal.
Nos no por permiti ningun hende, ni ningun situacion stroba nos di sirbi Dios, bao di ningun menasa , nos no por keda sin sirbi Dios.( Daniel 3:16-18 y Daniel Capitulo 6;1-28).
Nos no por permiti ningun clase di trabao, amistad, politica, asociacion, club, aleha nos for di Dios, nos mester sirbi Dios, cu goso tur momento.
Nos mester ta asina fuerte cu asina nos mira algo, cu ta contrali na boluntad di Dios ta tumando luga, nos ta hala atencion di otro, coregi otro, y si no tin contesta firme de boluntad di Dios, nos tin cu aparta, pasobra despues no por duna excuus na Dios.
No ta existi un temporada den nos bida cu nos ta bandona Dios, bay mundo, bay den cosnan abominabel, y despues kier regresa na Dios, e acto ey no ta biblico, e no ta para scirbi ningun caminda.
Nos tin di persevera den nos servicio na Señor pa ningun hende no kita nos corona.( Revelacion 3;11).
Hopi hende ta sirbi nan mes en bes di sirbi Dios, nan ta mas ocupa cu nan outloook, cu nan ta ocupa den cosnan di Dios, nan ta trahando nan mes reino, en bes di traha pa e reino di Dios, nan ta trahando riba cosnan temporal, en bes di pone bista riba cosnan eterno. Laga nos corda bon cu ora nos muri , nos no por bay cu na nada, y tur locual ta keda atras lo pasa den man di otro hende. Ora nos ta morto, no por obliga ningun hende cumpli cu nos deseo.
Pasobra boso a wordo yama pa libertad, rumannan, solamente no uza boso libertad como un oportunidad pa e carni,ma laga un sirbi otro pa medio di amor.
Y tur cos cu boso ta haci, cu palabra of cu hecho, haci tur den nomber di Señor Hesus, dunando gradicimento door di dj’E na Dios.e Tata.(Colosensenan 3;17).
Esun cu ta tene misericordia di hende pober, ta fia Señor. Y E lo page bek pa su bon obra.( Proverbionan 19:17).
Hopi ta e penanan di e malvado, ma esun cu ta confia den Señor misericordia lo rondon’e.
Sea contento den Señor grita di alegria boso, hustonan, y grita di alegria, boso tur cu ta recto di curason.( Salmo 32:10-11).
E goso di Señor ta nos fortaleza, laga nos alaba Señor den Spirito y den berdad, laga nos sirbi Señor cu fieldad, y cu confiansa, pasobra Señor ta bon, Señor ta misericordioso, Señor ta cu nos.
Sinceramente Pastoor Marcel Balootje.
