Den e buki di Hebreunan, Dios ta duna un advertencia hopi serio cu nos tur tin cu tene cuenta cu ne pa nos bida, nos hogar y nos famia.
Hebreunan Capitulo 3:12-18 ta bisa: “Tene cuidao, rumannan, pa no tin den ningun di boso un curason malvado y incredulo door di aleha for di e Dios bibo. Ma encurasha otro dia tras dia, tanten cu por papia di ‘awe’ ainda pa ningun di boso no endurece door di engaño di pica. Awe si boso tende su bos no haci boso curason duro, manera tempo cu nan a provoca Mi.”
Cuanto biaha bo por papia cu un persona p’e stop di uza droga, alcohol, infiel, gañamento y bo ta haya e contesta pa no mete den su bida.
Un hoben cu no kier tende di su mayornan y ta sigui rebeldia. Un homber abusado cu ta sigui maltrata su casa y yiunan. Den un palabra bisa tur hende cu ta practica un of otro maldad y no kier arepenti. Aleha y kere den Dios y bo ta provoca Dios.
Segun e spirito di anticristo ta move riba mundo, e ta pone hopi hende gosa den pica y aleha for di Dios y hopi no ta tende y ta provoca Dios cu nan capricho (Romanos Capitulo 2:5-9).
Nos ta purba di splica mas comprendibel posibel pa e palabra di Dios por alcansa tur curason.
Den Juan Capitulo 3:16-18, Dios ta splica tur cos kico hende tin cu haci, e ta bisa cla y raspa cu esun cu kere den su yiu Hesus Cristo lo no bay perdi pero lo haya bida eterna. Y esun cu no kere lo ta condena.
Esaki ta palabra di Dios y no palabra di hende, pasobra tempo no ta warda riba ningun hende, salbacion ta personal.
No ta ningun hende ta husga bo ta locual bo mes a scoge. Esun cu kere lo ta salba y esun cu no kere lo bay perdi y cay den brasa di e malvado.
Ora un hende ta contra bo, bo por acerca Dios pa Dios libra bo di e hende, pero ora Dios ta contra bo, ken por libra bo. (1 Samuel 2:25)
Esaki ta e berdad, cu por zona duro y hopi hende no kier bisa hende e berdad y ta compinchi di maldad.
Pero con nos ta sconde un berdad asina grandi pa tur mayor y nan cas y famia, pasobra e palabra di Dios ta bisa cu esunnan cu haci nan curason duro y engaña door di pica, nan lo no drenta den e sosiego di Dios.
Hopi hende ta kere cu Dios mester bay di acuerdo cu nan y nan no tin temor di Dios.
Tur e cosnan cu nos ta mira ta sosode actualmente e aumento di maldad, violencia domestico, divorcio, maltrato, abuso, ta bin mayoria parti di hendenan cu a haci nan curason duro contra Dios.
Si abo scucha su bos ‘’AWE‘’ no haci bo curason duro.
