Mientras cu e chauffeurnan di Arubus N.V. ta den un reunion cu SEPPA pa trata e situacion di kita 12.6% di salario, pasaheronan a resulta afecta. Na e parada di bus den John G. Emanstraat e pasaheronan ta en espera di bus pa nan por yega nan destinacion.
E hoben Fabian di trempan ta warda bus na busstation, pero un persona a yega y bis’e cu no lo bay tin bus te despues di 4’or di atardi. E hoben ta wardando bus desde 1:30PM, pero mayoria hende a subi bus chikito pa por yega nan destinacion. El a expresa na 24ora cu e ta un carchi studiante tin y e ta un di esunnan cu ta uza bus constantemente.
Un otro pasahero cu ta warda bus a expresa cu si bus no yega, e lo cana bay na pia cual ta algo e ta custumbra di haci. E ta sinti cu e situacion aki ta afecta nan pasobra no tin servicio. Hopi hende ta biba leu y ta depende di bus. E ta recorda cu algun aña pasa ora cu chauffeurnan a protesta, no tabatin niun transporte den oranan di marduga p’e por a yega su trabou.
