Diabierna mainta testigonan atento a tuma contacto cu polis pa informa di algun hoben riba quadracer causando destruccion riba e santo blanco na Eagle Beach.
Cuater hoben turista a haya ta bon pa bay buta un show riba e santo blanco di nos beachnan durante nan rond trip riba nos isla. For di e momento ey basta testigo a cuminsa yama autoridad di e sucedido. Mientrastanto cu polis a presenta na sitio e hobennan aki a coi direccion playa.
A pone demas polis na altura y patras di Talk of the Town a bin encontra un di e quadracernan aki staciona. Un rato despues ta haya informacion cu e demas hobennan ta envolvi den un accidente riba caminda di camacuri.
A bin topa cu e tres otro hobennan aki dilanti cura di aeropuerto caminda cu un di nan lo a bin dal tras di un vehiculo staciona eynan disfrutando di aterisahe di avion. E chauffeur a conta di a hiba un susto hunto cu su nieto sinta den auto, na momento cu e quad a bin dal nan tras.
Polis a presenta na sitio y duna e hobennan aki un scual di otro mundo. A bin constata cu e hobennan aki ta menor di edad. A tuma contacto cu doño di e compania di tour pa bin busca e vehiculonan aki na sitio. Mientrastanto e transporte di polis a yega y transporta e turistanan pa warda di polis.
