Parlamentario independiente Daphne Lejuez a lansa preguntanan minister Dangui Oduber, pasobra el a nombra shete persona di su ministerio pa un otro departamento cu un contract di cinco aña. Te ainda e parlamentario no a haya un contesta. Ta importante pa haya un conseho di departamento di Recurso Humano di Gobierno (DRH), pa evalua kico nan opinion tabata riba esaki. Prome cu opina, ta importante pa e mandatario contesta e preguntanan aki pa compronde miho ta kico a pasa y dicon el a pasa.
Segun parlamentario di fraccion di MEP, Setty Yarzagaray, en berdad locual Algemene Rekenkamer ta indica cu e tres factornan importante cu semper gobierno tin cu tene cuenta cu ne, cu pa nan tambe ta e parti cu ta un peso hopi grandi riba presupuesto di pais Aruba, ta costonan di personal, pero tambe costonan di interes y e debe mes. A tuma nota den e cuentanan anual di 2017, e gastonan di personal a subi.
Tambe a subi Goederen & Diensten y tambe huur di edificio. Esey ta loke cu Algemene Rekenkamer a trece dilanti. Pa 2018, tabata ainda e hecho cu den aña di eleccion 2017, tabatin mas hende cu a drenta gobierno. Den 2018, no por a kita e hendenan aki. Tin diferente caso hasta cu tin empleadonan cu a gana nan caso cu mester mantene nan na trabao of tin cu paga nan.
Pa esaki toch ainda ta nota cierto componentenan den e parti di gastonan di personal cu ta hasta surpasa e aña anterior. E ora ta bisa cu tur e efectonan aki sigur e ta pisa hopi vooral awo cu ta den crisis. E parti cu tin cu maneha e costonan ta hopi importante. Gobierno tin un plan traha, segun Yarzagaray.
Si e ministernan ainda ta pensa pa tuma cierto hende, ta spera cu ta dentro di e cuadro y e espacio financiero cu nan tin, mirando e hecho cu e parti di e beheersings personeelskosten, ta parti awo di CAft, di e normanan di un vision di e maneho pa baha di costonan di personal. Si acaso tin nombracion ta tuma luga, di parti di cualkier minister, ta spera semper cu e por responsabilisa cu tin un funcion y cu tin placa. Na final di dia esey a trata, si e gobierno ta traha den su espacio, e cuadro financiero cu Parlamento ta autoris’e pa traha.
Parlamentario Richard Arends di AVP, a splica cu ta wak cu den e consehonan di CFT, pero tambe di Rekenkamer ta conclui cu e maneho financiero uno, no a funciona y e gastonan a sigui subi.
Te cu 2018, gastonan a sigui subi, gastonan di personal y di subsidio. No tin ningun esfuerso genuino pa reduci gasto y esaki a keda confirma te cu 2018 den e cuenta anual. Sa tambe di e consehonan pa e presupuesto pa 2019 y 2020, cu no tabatin esfuersonan genuino pa reduci gasto.
Ta mira tambe esey cu gasto di personal ta sigui subi. Ta yega na nan oido cu ta nombra mas hende den gobierno. Ta puntonan cu siguramente a trece dilanti durante reunionnan parlamentario.
