Lider di fraccion di MAS den Parlamento, drs. Marisol Lopez-Tromp a manda un serie di pregunta na Minister di Husticia, Siguridad y Integracion, mr. Andin Bikker, relaciona cu su maneho di instala camaranan di siguridad den varios area strategico riba nos isla
Durante e reunion publico recientemente pa trata presupuesto 2021, tabatin algun pregunta cu a haci na Minister demisionario di Husticia, pero cu e no a contesta completo y/of a keda sin contesta. Den cuadro di su trabou como parlamentario, Marisol Lopez-Tromp a manda puntra Minister Bikker dicon no a stop e contract si e camaranan di siguridad cu tin instala riba nos isla no ta trahando? Si no a bay bon cu e camaranan, pakico a uza e mesun compania, Safecom, pa e proyecto di radar? Tabatin un clausula cu por a para e contract di camaranan? Dus a paga mensualmente djis pa paga y sin reclama? Cuanto e suma ta mensualmente?
Relaciona cu e ultimo aki, parlamentario Marisol Lopez-Tromp a pidi, conforme e L.O.B. y den cuadro di transparencia y su trabou pa controla Gobierno, e kier mira, no mas tarda cu dia 20 di augustus 2021, den tur e documentonan relata na e procedura y preparacion pa destaho, ofertanan, etc, cu ta concerni e contractnan, cartanan y correspondencia di Gobierno, consehonan
ricibi, decisionnan tuma, etc pa cu e sistema di camaranan di cual Minister demisionario a bisa den Parlamento cu el a laga e contract aki caduca, a pesar cu e camaranan aparentemente no a funciona.
Riba e tema di uniform nobo pa polis tin e siguiente preguntanan: Pa loke ta e decision di uniform nobo, lo tin continuidad? Dus tin un compania cu a haya encargo pa cu uniform di polis? Esaki tabata pa un solo bes? Ta keda uza dos uniform? A cambia ley di tal manera cu e uniform cu e polisnan ta uzando ta legal conforme nan dienstvoorschriften? Uniform tabatin prioridad riba e klas cu mester a start? E tabatin prioridad riba bulletproofvest? Con e proceso ta bayendo?
Pa loke ta trata e seccion ICT, esta sistemanan computarisa y digital di polis, con ta bayendo cu esaki? Parlamento a compronde cu for di basta tempo caba polis tin problema cu nan sistema di computer. Con ta cu e parti di ICT? E problema di ICT a wordo soluciona? Ta asina cu ta huur computer?
Ta un lista di pregunta cu e parlamentario a manda pa presidente di parlamento, cu na su turno mester manda pa minister Bikker prome cu e baha como mandatario. Como cu formado a anuncia awe cu lo dura por lo menos dos siman mas prome cu e por keda cla cu formacion, ta nifica cu e ministernan actual tin sigur dos siman mas di trabou. Tin tres minister cu definitivamente lo no regresa den e siguiente Conseho di Minister, cu ta Andin Bikker, Rudy Lampe y Chris Romero.
