Ex director di Dr. Horacio E. Oduber Hospital y neurologo dr. Jaime Falconi ta un persona cu sigur sa hopi di mundo medico y tambe di e tipo di situacionnan cu por presenta na momento cu pashentnan haya remedi receta door di un dokter. Dr. Falconi a comenta riba e keho di Hector Mercado, cu a haya receta di un assistent di dokter, na luga di un dokter. E specialista pensiona ta haya e keho completamente na su luga.
E ta bisa esaki pasobra awor aki y esey el a bin ta publica diferente biaha caba riba Facebook, cu e tin miedo cu pa motibo di tanto atencion na Coronavoris, cu e capacidad di cuido den hospital lo por bay yega na tal extremo cu atende pashentnan cu tin problemanan diferente cu Covid, lo core peliger.
Den e caso aki, e pashent Hector Mercado berdad tabatin chens di por a fayece, pasobra el a haya un reaccion alergico masha pisa. Esaki ta pashentnan cu por lo general ta cana rond cu un pen pa si nan haya e reaccion aki, pasobra e tin chens di hay’e atrobe, pa por inyecta su mes y reduci e keho na e momento ey. Pasobra cada biaha e ta core riesgo cu por ta reaccion lo por bira mas pisa. Pues, e tin un critica valido.
Dr. Jaime Falconi a sigui splica cu tin un tempo ta urgiendo esunnan responsabel cu e cuido regular no mag di core peliger. E miedo ey dr. Falconi tin. E caso aki di Hector Mercado ta tipico un bon ehempel di kico ta pasando, e no ta kere cu ningun dokter di cas tin culpa.
Si analisa bon, e dokternan di cas ta en realidad na warda 24 ora pa dia, 7 dia pa siman, pasobra nan tin nan spoeddienst tambe. Nan tambe ta ser humano si, sinembargo, nificando cu en berdad de bes en cuando algo por sosode. Pero e pregunta mas cardinal den esaki ta, cu esey ta en berdad loke Hector Mercado a trece p’adilanti, ta con por percura pa e cuido regular no core peliger.
Diferente biaha el a expresa via Facebook, cu e ta compronde e magnitud di e problema di e pandemia, pero lamentablemente por ripara tambe den un entrevista cu a sostene cu director medico di hospital, cu nan tambe ta sperando riba ayudo, pasobra nan tin miedo cu lo por yega un momento cu e capacidad di cuido lo por wordo perhudica.
Dokternan cu no tin BIG por duna un man
E problema principal ta scarsedad di dokter. Segun dr. Falconi, nos yiunan di tera cu no tin registracion di BIG, ta suficientemente prepara pa haci nan trabao. Pero nan tin cu warda AruBIG. Na momento di tuma un decision, mester percura si pa ta suficientemente cubri pa si en caso sosode un problema, por bay bek riba un sistema di control. Awor aki ta asina cu nos ta den un pandemia y e situacion ta saliendo for di man. Awor aki mester all hands on deck pa purba di contene e plamamento.
E specialista pensiona a admiti cu si a puntr’e 5 aña pasa riba e asunto aki, cu su contesta sigur lo tabata negativo. Pero, awor aki, teniendo na cuenta e circunstancianan cu nos pais ta pasando aden, e ta haya cu e dokternan Arubiano studia den region ta suficientemente cualifica pa en todo caso haci e prome screening, si ta necesario bao di guia di e dokternan den eerste lijn cu tin suficiente experiencia.
“Pero mi no ta compronde e maneho tur ora”, segun dr. Jaime Falconi. E ta duda tin biaha pa expresa opinion, pasobra e reto ta hopi grandi. Ora cu a habri frontera, por a premira cu e tipo di accionnan aki ta bay tuma luga.
Si mira Boneiro, nan tin algun caso extra y ya caba nan tin un sorto di lockdown. Boneiro por sostene riba ayudo financiero Hulandes. Pero den e caso aki nos no tin’e na Aruba. Segun e specialista, tin cierto momento, mester tin all hands on deck. Mester tin un sistema si cu por haci un control debido pa cosnan no sali fo’i man. Pero e ta posibel y e ta necesario na e momentonan aki.
