Tras e desaroyonan di ultimo dia caminda Sindicato di Polis Aruba (SPA) a lanza un ultimatum den direccion di Minister di Husticia, Rocco Tjon, e parlamentario di coalicion tambe a pronuncia su mes den fin di siman. Dialuna mainta Molina, di fraccion MEP, a declara su mes di ta bon na altura di situacion cu tin e sindicato disgusta, pero tambe di e diligencia cu e titular di husticia ta haciendo y ta convenci cu e unico chens pa yega na un solucion satisfactorio ta door di mantene e dialogo.
E parlamentario no tin duda cu e morto di un colega den fin di siman na man di cancer, ta consecuencia di e existencia di schimmel den e edificionan di warda di polis na Playa y na San Nicolas. Como un ex agente policial, Molina ta testigo cu e edificionan ta den un estado deplorabel, sin debido mantencion, sin airco cu na dado momento, etc. Condicionnan excelente pa e proliferacion di schimmel cu su consecuencia pa e salud di esunna cu ta traha aden.
“Por lo menos cuater colega a haya cancer na e mesun luga, na nan garganta y mester a bay afo pa tratamento. Dokter a indica cu ta e schimmel por ta e causa di esey; experto a indica cu ta schimmel por causa e tipo di cancer aki y ta conoci cu schimmel ta dañino,” asina Molina a indica. E ta contento si cu e minister actual ta tumando accion, door di percura pa tin limpieza andando den e dos edificio aki, pero e ta un medida temporal.
Como un solucion duradero, e parlamentario di MEP ta wak pa Polis haya un edificio adecua, safe y saludabel. Ta admiti cu e edificio di ex Codemsa na Cumana por ta e solucion, pa cual ta pusha y monitor y ta pidi minister pa percura pa for di comienso e edificio ta adecua cu tur ekipo in place, e airco ta traha bon, e air purifiers, etc. Molina ta sinti cu esey ta su trabou como parlamentario; pa urgi.
Pa e relato completo, lesa edicion di TREMPAN
