Polis ta sinti cu ta maltrata nan tur dia, ta purba kibra e cuerpo, ta demotiva nan y ora nan muri debi na malesa di e ward’i polis mes, e ora minister tin curashi pa desea polis forsa. Ta cuanto forsa mas mester tin? Cuanto colega mas mester muri prome cu gobierno realisa cu asina no por trata hende?, ta loke sindicato di polis, SPA a indica den un articulo publica riba 24ora.com.
Riba dje cu ta e mesun minister Rocco Tjon ta esun cu a bin cu e famoso ziektenbeleid cu ta perhudicando varios otro colega polis cu debi door di e insiguridad di e propio trabou, stress di trabou of e schimmels como algun ehempel, ta bira malo y awo gobierno por medio di DRH, ta castigando nan. Esaki ta hipocresia, nan a indica.
Di parti di minister Tjon, a sali un carta dirigi na SPA, caminda cu e minister ta purbando di suavisa cos p’asina, manera e carta ta bisa ora sinta dialuna dialoga, pa mira kico por haci al respecto.
El a bisa den e carta tambe cu su portanan ta keda semper habri ‘e sindicato y ta cla pa sinta cu e sindicato, mirando cu a manda nan un invitacion diasabra p’e reunion di dialuna mainta den e ministerio.
NO TIN SCHIMMEL
Un di e puntonan cu e sindicato a trece padilanti ta e asunto di schimmel, unda cu e minister ta pone enfasis cu segun midimento a demostra cu tur conclusion, cu no tin schimmel, contrario na loke cu SPA a referi na dje den diferente ocasion, cu varios walk-out p’asina demostra nan mal contento.
E ASUNTO DI AUTO DI DIENST
Tambe un otro punto cu e minister ta haci referencia na dje ta e autonan di servicio. Aki e minister a considera importante facilita informacion precies riba e vehiculo envolvi den e accidente cu a costa bida di un hoben polis.
E minister ta indica cu segun e personal di SPA y KPA, e vehiculonan ta gehuur regularmente (casi semanalmente) p’e propio KPA, sin participacion algun di e ministerio, na diferente compania di huur auto. Esaki tambe ta necesario mirando e naturalesa di e trabao cu e diferente departamentonan di KPA ta ehecuta.
E minister ta insisti cu su ministerio no tin ningun papel den esaki, ni e ta considera deseabel p’e tin. Den otro palabra aki e minister ta indica di ta laba man den esaki. “Dit is des KPA”, ta loke el a bisa den e carta.
