Aña pasa a sali na cla e mal maneho di ex-Minister Plenipotenciario, Guillfred Besaril, na Arubahuis. A cuminsa cu un investigacion riba loke el a haci, pero no ta persiguie. A haya un audio comprometedor unda cu e Minister Plenipotenciario actual a informa riba e situacion aki e tempo ey caba y a indica cu prome minister tabata na altura. Tambe el a vocifera cu e bom di Arubahuis lo explota.
mr. Juan ‘Ady’ Thijsen, Minister Plenipotenciario, a indica cu e situacion di Arubahuis ta uno cu ta tolera un situacion cu no por. E ta haya cu no por ta mita integro y otro mita no, sea bo ta of no ta, si ta grita pa integridad Loke Guillfred Besaril a haci, e mester a move caba. E ta haya cu si mester regl’e, esey ta otro cos, pero e no por keda den e posicion.
P’e situacion aki Thijsen no ta sinti bon. El a cana den Arubahuis y a papia cu algun persona, y por a mira cu e atmosfeer tabata malo. Tin persona cu ta traha cu miedo, ta traha disgusta, tin miedo di bisa algo. El a sigui splica cu Besaril no tin control riba y no sa kico e ta haci. Tin cu kit’e di eynan, pasobra, segun, Thijsen, nan dos lo haya problema. Incluso Prome Minister Evelyn Wever-Croes sa esey.
Minister Plenipotenciario a indica cu den caso si a laga Besaril eynan, e ora si cos a bira pio. El a enfatisa di no por traha cu un persona asina, un persona cu a haci fraude. Loke lo pasa despues lo lastra Thijsen tambe den e asunto aki. Thijsen a indica cu e bom lo explota riba nan, esta gobierno, fo’i AVP mes. Parlamentario Gerlien Croes a haci pregunta por escrito riba e asunto aki. Mike Eman ta keto y ta laga Gerlien haci e trabou. AVP tabata warda riba e decision, warda kico Evelyn tabata bay haci.
Ora cu Evelyn haci e movecion y cu Besaril t’ey ainda, e ora ey nan ta bay p’e. Ey nan lo bisa cu Evelyn ta papia di integridad, pero wak awo y esey e ta tolera.
