Algun aña pasa abitantenan di bario di Sta. Rosa i bisindario tabata anhelá ku e rotònde lo mester a trese un mihó fluho di tráfiko despues ku e lusnan di tráfiko a keda eliminá.
Pero ya kaba durante di e konstrukshon dudanan nan a kuminsá lanta mirando e kantidat di filanan ku ta tin rondó di e rotònde teniendo kuenta ku e kantidat grandi di outomobilista ku mester hasi uso di esaki pa por bai nan destinashon. Na momento ku a habri e rotònde aki por a tuma nota klaramente ku e no a duna e resultado deseá despues ku a eliminá e lusnan di tráfiko.
Aparte di e kambio di lusnan di tráfiko pa rotònde tambe a disidí di pone drèmpelnan djis despues di e rotònde direkshon di entrada di Misa di Sta. Rosa/Ritz i pa kaba kompletá esaki a habri e posibilidat pa outonan por drenta djis despues di e rotònde den direkshon di Sta. Rosa/ Ritz ku ta opstakulisá e fluho di tráfiko ainda mas. Esaki ta un situashon ku ta trese iritashon i disgustu pa outomobilista, abitantenan, shofùr di bùsnan etc ku trafiká riba e kaya aki diariamente.
Den kuadro di esaki sra Mc William ta urgi Minister pa mas pronto ku ta posibel pa laga hasi un investigashon i análisis di e situashon di tráfiko aki riba Sta.Rosaweg na e rotònde pa por yega na solushon pa ku e situashon aki.
