Resientemente mi a tuma nota di un rapòrt ku a lèk den medionan di komunikashon. Un rapòrt ku tin solamente tres ehemplar kual unu ta na RvB di SEHOS, unu serka dr. Faries i unu na Inspekshon di Salubridat.
Ku hopi preokupashon mi a tuma nota kaminda pashèntnan di menor edat nan sekretonan médiko a wòrdu usa den un rapòrt dor di un verpleegkundige sin ningun klase di outorisashon di mayornan pa ku sekreto médiko di nan yunan ku awe ta keda usa kontra di dr.Faries.
Mas aleu e mayornan di pashèntnan di menor edat aki tampoko a haña “inzage” riba e rapòrt aki despues ku e la wòrdu traha pa asina sigurá ku loke ta para den rapòrt aki ta kuadra ku realidat.Meskos ta konta pa e propio dr. Faries ku nunka a haña e oportunidat pa skuch’e (wederhoor) pa loke e verpleegkundige aki ku resientemente a wòrdu rekruita pa yuda ku e maneho di pa ku pashèntnan menor di edat diabétiko na Sehos, ku netamente dr. Faries atendé pa años den e pais aki. E resultado di e rapòrt aki wòrdu usa pa e audit kontra di dr.Faries. E manera ku henter e prosedura aki a kana ta kontra di hustisia i dignidat humano,ku komo Frakshon di MAN ta base di tur prosedura ora ta atendé ku hende.
Bibu den mi memoria ku dia mi persona a menshoná dr.Misset su nòmber den medionan di komunikashon despues ku sala di Operashon a buta trabou abou pa motibu nan konosí, mi a wòrdu katalogisá dor di Inspektor General komo “misdadeger”!
Ta sorprendé mi ku awor ku a menshoná nòmber di e dr. Faries pero Inspektor General no a ripití e palabra aki den e kaso aki.
Frakshon di MAN ta para pa hustisia i dignidat humano.
Ta lamentá e desaroyo aki ku tin komo konsekuensia negativo pa seguridat i konfiansa di pashèntnan (menor edat)den nos Hospital.
Falta di transparensia i outorisashon di mayornan pa uso di informashon di nan yunan i hasta bai den nan dossier dor di otro spesialistanan sin pidi nan pèrmit.
E spesialistanan profeshonalnan ku a forma parti di e tipo di prosedura no étiko aki ta algu di kondena i mester atendé ku nan. Pa e motibu aki ta sumamente importante pa bini ku “Patientenrechten” pa asina sierto dòkternan i spesialistanan i profeshonalnan den Salubridat stòp di hasi i deshasí pasombra esaki ya no ta akseptabel mas den e pais aki.
Mayornan korektamente a saka un karta i trese nan vershon korekto
dilanti i kondena e tipo di práktikanan aki.Algu ku mi ta aploudí unda nos hendenan no ta keda ketu mas. E karta aki ta trese ainda mas pregunta riba e audit aki. Kiko su meta real tabata. Mirando e desaroyo aki ku ta mishi ku esunnan mas vulnerabel ku nos muchanan komo Parlamentario mi ke haña mas klaridat riba e asuntu aki.
Den kuadro di esaki sr Mc William a hasi e siguiente pregunta nan minister di Minister di Salubridat Públiko, Medio Ambiente i Naturalesa:
- Ta bèrdat ku a traha e audit aki riba dr.Faries basa riba konklushonnan di un verpleegkundige i un co assistent?
- Ta bèrdat ku despues ku esaki a keda konkluí dr. Faries no a haña e oportunidat pa “wederhoor”?
- Mayornan a haña oportunidat pa reakshoná riba e rapòrt ku a keda traha dor di e verpleegkundige aki?
- Ta bèrdat ku e resultado di audit ta “ter inzage” solamente na RvB di SEHOS, unu serka dr.Faries i unu serka Inspektor General.
- 5. Kiko ta bai hasi e ku e karta di mayornan, mirando kon kontradiktorio esaki ta ku e resultado di e audit?
