Parlamentario di PAR, Ana Maria Pauletta a manda un karta pa minister Zita Jesus-Leito, Minister di Tráfiko, Transporte i Planifikashon Urbano, unda e ta indika lo sigiente:
Frakshon di PAR a tuma nota di e konfushon ku a bin dilanti pa ku e maneho di Ministerio di VVRP pa ku pèrmit di tereno. Pa frakshon di PAR ta importante pa aklará e konfushon aki, pa asina komunidat kompleto por ta sigurá ku ta salbaguardiá su derechonan i tambe kuida e propiedat di pueblo.
Kua ta e maneho ku un siudadano tin ku di sigui pa haña un tereno di gobièrnu, òf sea pa traha kas, uso komersial òf uso pa agrikultura?
Kuantu tereno a ser entregá den último 5 aña nan?
Kuantu petishon di tereno pa traha kas, uso komersial òf uso pa agrikultura tin awor aki na Domeinbeheer?
Kuantu persona tin riba e lista di espera aki?
Ta asina ku a kuminsá bou di maneho di señora Camelia Romer ku e maneho di ‘ Tereno pa tur, pero na òrdu’. E maneho aki a wòrdu introdusí, pa motibu ku tabatin praktiká nan di ilegalidat na gran eskalá ta tumando lugá. Na konosementu di frakshon di PAR e maneho aki ta enserá ku tur persona ku a kue un tereno di forma ilegal prome ku òktober 2015, mester pasa Domeinbeheer pa mèldu esaki i na e momentu ei ta evaluá si e tereno ta bin na remarke pa legalisá. Tambe ta enserá ku mester paga un multa.
Den kuadro di esaki frakshon di PAR tin algun pregunta:
Frakshon di PAR kier informá serka Minister Jesus Leito kon ta para ku e maneho aki? Parlamento lo por risibí un kopia di e maneho aki?
Kuantu persona a registrá for di aña 2016, hasiendo uso di e maneho nobo aki? Tantu na Domeinbeheer, komo na notario?
Minister tin plan pa kontinuá ku e maneho aki?
Ta asina ku frakshon di PAR a ripará ku e praktiká pa apropiá di tereno di gobièrnu di forma ilegal a kontinuá i tin persona ta kue tereno destiná pa agrikultura pa konstrukshon di kas, koba greis ilegal i dera sushi. I tambe un fenómeno adishonal ku ta apropiá tereno di gobièrnu di forma ilegal pa hasi negoshi riba dje. Den último simannan nos por a tuma nota di un kaso bastante konosí kaminda a resultá ku un doño di negoshi no tin pèrmit pa konstrukshon, pero ta operando años su negoshi.
Nos a tuma nota di un karta kaminda Minister a duna e negoshi aki un pèrmit pa sigui operá pa 6 luna, pendiente un desishon di gobiernu. Minister lo por splika ta kiko ta e motibu pa e desishon aki?
Kua lo bira e maneho pa ku pèrmit pa operá ‘mobile cantines’ ( trùk di pan)?
Frakshon di PAR ta gradisí Minister pa e kontestá nan.
