Pa exactamente 1:00 PM e parada di mucha di Playa a ranca sali, escolta pa tur e personahenan di carnaval. E echo cu e parada a cuminsa exactamente 1:00 PM ta haci cu lo tin suficiente tempo pa e participantenan por disfruta di e dia aki.
Na aña 2020 un total di cinco grupo a participa den Parada di Mucha, di cual 955 mucha tabata participante. Pa motibo di pandemia di Covid-19, pa dos aña no tabatin carnaval, cual tabata na 2021 y 2022. Na 2023 e participacion tabata di cuater grupo y rond di 700 participante. Pero, e aña aki a conta c’un participacion di seis grupo y mas di mil mucha.
Darren van Ommeren, presidente di SMAC, a splica cu pa tur cos bay smooth, e mes a percura pa e prome cuater gruponan sali un tras di otro despues cu 1:00 pm a bati. E aña aki cu Aruba ta celebra 70 aña di carnaval, e parada aki, cu ta esun mas grandi di e muchanan, a conta cu participacion di seis grupo y cu participacion di mucha y adulto riba caminda. Segun e presidente di SMAC, e aña aki tin mas hende den e parada, compara cu 2023, pero na mesun momento ta bisa cu e diferencia no ta di e grandi ey.
Julisa Boekhoudt a guia e grupo di Reina Infantol di Aruba, esta Xeena Dijkhof. E ta reina di Districto di Noord tambe. Boekhoudt a bisa cui e ta orguyoso di nan bario di Noord cu ta un di e tiki barionan cu ta celebra carnaval na grandi. “P’esey tin riba e carosa un cas tipico den Noord, di Titi Tromp. E ciudadano aki ta un di e pilarnan pa inicio di carnaval den Noord.”
Un cara cu por mira den tur carnaval di Aruba ta di Liliana Rasmijn, vocero suplente di Cuerpo Policial di Aruba (KPA). No solamente e ta mira y percura hunto cu su coleganan tur cos ta bay bon, pero ta atende prensa tambe cu mester di informacion.
El a confirma loke cu presidente di SMAC a bisa, cu e parada a cuminsa na ora riba conteo di Yearwood cu ta duna e conteo final p’asina e brassband cuminsa troca y move direccion di e ruta. Door di un incidente chikito riba e ruta, esaki a causa cu a surgi un gap, pero den forma rapido a cera esaki bek.
Pa e parada na Playa a pone hopi mas funcionario riba pia. Ta papia aki di 187 persona, di diferente unidad y incluso personal di CEA. Hasta e seccion di Recherche tabata riba pia manera cu ta na vigor Faya Bo Haya.
E grupo cu a sigui tras di esun di Noord tabata Don Flip Carnival Group, lidera pa Penelope Tromp, kende a bisa cu e grupo a bini den grandi. E tabata masha entusiasma cu resultado final, unda no solamente tin carosa, pero tambe roadpiece y masa. “Tin hopi ambiente y nos ta preparando for di aña pasa”, el a conta. Den e parada a participa cu 3 roadpiece, 4 seccion y e masa cu a participa cu e tema “Adventure of the Amazonias”, unda tin tur cos ta di flora y fauna. “E mensahe tras di esaki ta pa conscientisa un y tur pa cuida naturalesa.
T.O.B. Carnival Group ya tin nan nomber marca den carnaval di Aruba. For di inicio e tabata lidera pa Lisette CHung, un ferviente amante di carnaval. “E ta un dia hopi cayente y calor, pero e muchanan ta yen di ambiente,” el a bisa.
Nan a participa cu un carosa grandi di Mama Coco, combina cu tres roadpiece y naturalmente e seccion di masa. Nan a conta cu participacion di 250 mucha, cu ta mas cu aña pasa. “Nos a traha duro pa yega aki. Y mester a busca un relay grandi como musica di apoyo pa e grupo aki cu ta basta grandi.”
T.O.B. lo bini mas grandi otro aña ya cu lo ta celebrando nan 15 aña di participacion den carnaval, Chung a conta. Y e organisacion T.O.B. mes lo ta celebrando 25 aña di existencia.
Grupo di Carnaval Empire ta un grupo conoci den Aruba su carnaval. Sinembargo esaki ta prome aña cu nan ta participa den parada di mucha. “Nos ta super contento di por representa e tema Sapaté,” Janice Kock-Boekhoudt, lider di e grupo, a duna di conoce.
Nan a participa den e parada cu un carosa grandi na inicio, sigui pa un grupo di mucha cu a presenta cu e diferente tipo di sapatonan. Despues a sigui un mini carosa cu ta representa un Sapate cu ta drecha sapato. Seccion dos por mira sapato den forma di roller blades.
Buleria a compaña e 60 pa 70 persona den e grupo aki, tanto participante como e mayornan cu a compaña pa yuda. “Nos ta contento cu nos prome participacion den parada di mucha y nos lo t’ey atrobe otro aña.”
Un cara cu no por a faya ni den e parada chikito ta Pastoor Jairo, alias The Priest, kende pa prome biaha a participa den e competencia di Caiso & Soca Monarch. “Mi a sinti bon cu mi participacion,” Maduro a bisa. EL a sinti su mes hopi bon pasobra e ta disfruta di e evento. E ta kere cu tur participante tabata bon, ya cu cada un tin nan forma di presenta nan mes. E escenario si ta un reto, ora cu bo ta riba un escenario grandi.”
Pa mas lesa TREMPAN.COM.
