Dia 24 di juni awo lo celebra e tradicional Dia di San Juan.
Un di e clubnan cu a sa di mantene e tradicion aki bibo ta SV Sportboys. Soraida Boekhoudt, Presidente di Sportboys Club a bisa cu e aña aki nan ta celebra e tradicion aki den su di 63 edicion, pero ta 65 aña di celebracion.
Dia 24 di mei ultimo Sportboys Club a celebra 65 aña, pero door di e pandemia pa dos aña no tabatin celebracion.
PROGRAMA
Pa e anochi aki nan tin un programa prepara. Pa 5:00pm nan ta ranca sali cu e dushi musica di Caha di Orgel cu su Adorada di Chido Marin, sigui pa e grupo di baile di Madeline Kelly.
Pa 7:00pm Grupo Stimami lo cuminsa deleita e publico y pa e climax di e anochi aki cu e baile di bandera di matamento di e gay y e baile di wals.
Pa 9:30pm Mi Adorada di Chido Marin lo subi bek pa haci e baile di San Juan.
Pa clausura e anochi aki, pa 10:30pm, Grupo di Betico lo ta riba escenario.
CELEBRACION CU E PUEBLO
E aña aki a scoge pa celebra cu e pueblo, specialmente e pueblo di Angochi, un concierto pa celebra nan 65 aña di existencia.
Boekhoudt a remarca e importancia di e sorto di actividadnan aki. Nos bieunan tin un dicho cu ta bisa: “Bo mester sa di unda bo ta bin pa bo sa na unda bo ta bay.”
HUNTO CU E PUBLICO
San Juan ta un evento unda cu e publico por ta participe den matamento di gay. E publico ta hopi importante, ya cu nan aporte n’e bar y cushina di e club, nan tambe ta contribui cu e club pa asina sigui organisa mas evento cultural.