E proceso di eleccion ta bay via un ambtelijke voorberijding. Glenn Thode, como presidente y e otro miembronan di e conseho electoral mes, no ta individualmente participa den esaki, pero ta algo cu en berdad, a base di experiencianan di añanan pasa, tambe atrobe ta bay mira si mester di un of otro forma adapta un team, pasobra por ta un hende ta malo, un hende a biaha bay afo, a imigra di Aruba, of cualkier otro rason, por ta no ta forma parti di e stembureau. Tin cu wak tambe, hende ta gewoon pa cualkier motibo, lo mester e ora forma e stembureau completo y asina ta prepar’e, a base di experiencia y ta bin un nombracion y un entrenamento e ora ey, segun Thode.
Urna
Thode a splica cu e cantidad di urna, manera cu a keda indica, riba e website di Censo, bao di kiezerslandschap, por mira tur e urnanan cu tin. Nan ta 62 urna regular y tin dos urna special. Tin 64 voorzitter tambe di stembureau y si no ta kiboca, e cantidad e cantidad di miebronan cu tin cu busca ta 136. Tur e informacion aki ta wak’e hopi exacto riba e website di Censo. Ta haya tambe, si kier sa precies con e proceso mes lo bay, por te hasta les’e bao di comunicado. Tin un leidraad pa e stembureaunan, caminda cu e usuario por repas’e y sa cualkier detaye hopi specifico.
Colornan di partido
Pa loke ta e colornan di partido, tin di e partidonan cu tin e color igual. Glenn Thode a splica cu e ta spera cu tur hende ta contento cu cualkier decision cu bin. E punto ta cu ley ta perscribi cierto proceso den esey tambe. Ta tanto color tin y ta asina cu e partido cu a hiba un lista den eleccionnan pasa, tin preferencia pa si el a bolbe scoge pa e color eynan. Naturalmente ta asina cu despues di esey, si tin mas partido cu tin un color y no tabata tin uzo di e color eynan den e eleccion pasa, e ora ey lot ta determina cua partido ta haya e color riba e stembiljet.
Stembiljet
Awor aki ta bezig cu e stembiljet. Una bes cu establece e listanan di e cantidad di candidatonan riba e lista legalmente. E proceso ey tin cu pasa prome. Despues e stembiljet ta wordo hinca den otro. Naturalmente e modelo tur cos ta prepara. Pero ta e momento ey numa ta determina e stembiljet con e ta bay ta.
E trabao di mas pisa
E trabao mas pisa no ta Conseho Electoral mes tin’e, pero e personanan cu ta yuda ehecuta e trabao, cu ta esnan cu tin cu implementa e pasonan, esta organisa e stembureau como tal move e urnanan y mas laat. Un di e trabaonan mas pisa pa tur lo ta pa ta sigur cu e dia di eleccion tur cos ta cana conforme e proceso prescribi y cu tin orden y no tin duda den integridad di e proceso. E vigilancia cu mester pa percura pa no tin duda den e proceso, ta un di nan y e contamento naturalmente na final, ta rekeri concentracion. E concentracion ta algo sigur si a pasa full un dia caba den un stembureau, ta pone atencin na e proceso y despues di esey ta sinta pa e conteo. Esey lo ta un di e trabaonan mas pisa pa e personanan den e proceso aki.
Comodo y satisfecho
Thode te ainda ta comodo y satisfecho. Aruba ta un di e paisnan den mundo cu si bo wak’e bon, tin un tradicion di participacion democratico halto. Hopi hende ta bay vota. Ta spera e aña aki tin’e halto. Ta spera practicamente tur hende cu tin derecho di vota, pa bay vota. Esunnan cu no por, wak si por haya asistencia, pasobra ta posibel cu por vota cu asistencia tambe. Ta spera cu por celebra e ora eynan un participacion sumamente halto atrobe y na Aruba, una bes cu e resultado di eleccion ta conoci, tin un tradicion cu tin un paso di poder hopi trankil. Si wak manera na Merca, ultimamente tabata tin un pase di poder for di Obama pa Trump, el a bay hopi trankil. Pero tambe una bes cu un presidente sinta, manera e biaha aki di reeleccion di Obama, bo ta mira cu esey tambe ta trankil. Oposicion no ta bay bringa y bisa cu e proceso no ta bon. Si wak’e bon, awor aki tin un problema na Kenia riba e terenonan ey. Na Aruba tin otro tradicion y te ainda tin cu bisa cu Thode ta sumamente trankil y satisfecho con e proceso ta canando. Ta parce di ta un di e biahanan cu ta celebra democracia bibo, respetando nos constitucion y e leynan vigente riba esaki.
Reunion cu e partidonan
E proceso aki, caminda cu Conseho Electoral ta tuma luga independiente di Gobierno, Staten y di e partidonan den eleccion. Tin naturalmente miembro di e Conseho Electoral cu si ta di e partidonan cu tin asiento. E tresnan mas grandi di e resultado di e eleccion pasa, di tal forma toch riba un forma mas abstracto, semper ta considera tambe e banda eynan ora cu conseho Electoral ta tuma decision. Manera cu Thode a indica, nan ta opera independiente y pa e motibo eynan tambe nan no ta sinta directamente y no tin nodo tampoco pa sinta directamente cu partidonan pa e proceso aki.
