Emmaschool ta un di e scolnan cu no a habri riba e dia cu mester a cuminsa. Awe, 14 di september, nan a tene apertura di aña escolar 2020/2021 pa duna bon bini na muchanan nobo y esnan cu ta bishita e scol caba. E maestronan ta cu hopi animo pa enfrenta e retonan hunto cu e muchanan.
Durante dos siman e maestronan tabata den preparacion fuerte y maneranan positivo pa por enfrenta e retonan cu tin tanto interno como externo, Zuleika Wever, maestro di grupo 6, a bisa. E team hunto cu cabesante a yega na un consesus y nan tabata cla pa cuminsa cu e aña escolar.
E team completo di Emmaschool ta consisti di 140 persona. Esnan cu a tuma e confiansa y a presente na e apertura di scol pa ta hunto den e reto aki, a duna nan bon bini y e maestronan mes tabata ansioso pa cuminsa bek cu enseñansa na scol.
Na scol nan lo ta estricto pa mantene distancia entre alumno y maestro, aunke e ta un tiki dificil den enseñansa di muchanan special. Esey ta pa motibo cu e muchanan ta pidi afecto, ta pidi cariño y amor, cu ta e parti mas esencial cu nan ta pidi den e enseñansa aki. Nan ta mira con por bay educa e muchanan poco-poco pa esaki y duna tur amor y cariño apart di loke nan tin di haya pa termina e aña escolar.
Pa cualkier novedad cu por tin, como cu e scol tin su mesun Facebook page y website, ta conseha mayornan pa sigui nan y keda al tanto di e desaroyonan cu ta pasa na Emmaschool. Wever a bisa cu nan lo keda informa riba e Facebook page.
