Un accidente bastante fuerte a tuma luga dialuna mainta riba caminda di Hooiberg. Aproximadamente 11:40 AM a socode un accidente caminda un señora di edad a resulta herida y tabata pega den su vehiculo.
Esaki a pasa riba caminda di Hooiberg direccion Sta Cruz entre un Suzuki Alto (cora) A- 33170 cu un van di Setar. Daño material ta grandi, e Suzuki a keda destrui mirando cu mester a kibra e vehiculo pa asina libera e señora y sak’e afo. Materialenwagen di Brandweer mester a presenta pa corta e vehiculo. Den e vehiculo tambe tabata tin un chiwawa cu tabata basta spanta.
Di otro banda e van di Setar envolvi a ricibi golpi den e banda di chauffeur pero no tabata tin persona herida. Ambulance a presenta y asina transporta e victima pa Hospital.
