Aerolineanan ta cambiando rutanan, unda cu nan no ta overnight mas na Caracas. Nan a opta pa overnight na Corsou of na Santo Domingo.
E aerolinea TAP di Portugal ta cambia tripulacion na Corsou pa dos servicio di Lisboa opera pa nan socio EuroAtlantic. Te cu awo KLM-AirFrance no a haci niun cambio den nan seis buelo semanal desde Paris y no ta pensa di haci esey tampoco.
E crisis politico creciente na Venezuela a pone cu aerolineanan Europeo ta haci un stop den Caribe pa asina e pilotonan y steward(ess) no tin cu pasa e anochi eynan. E aerolinea Spaño Iberia ta uza Santo Domingo como punto di cambio pa su 3 servicionan semanal di Madrid pa Caracas y TAP ta pasa Corsou pa su vuelo di Lisboa. “Esaki ta nifica un costo adicional, pero siguridad di e tripulacion ta nos prioridad,” TAP a informa. Di otro banda Iberia no a comenta riba e gastonan adicional.
Por lo menos 35 persona a muri durante e manifestacionnan cu a cuminsa luna pasa na Venezuela, ora cu e lider di oposicion, Juan Guaidó, a reclama e Presidencia y miles di persona a inicia marcha contra e regimen di Nicolas Maduro. Departamento di Estado di Merca a emiti un alerta di siguridad dia 25 di januari, dunando orden cu no tabata di emergencia cu e personal di Gobierno Mericano bandona e pais despues cu Merca a reconoce Guaidó como lider interino. Gobierno di Hulanda tambe a emiti un conseho pa no bay Venezuela si no mester. Awe nan a informa cu oficialmente Hulanda ta reconoce Guaido, pero no a retira e diplomaticonan di Caracas, como cu ainda Nicolas Maduro ta sigui na poder.
