E siman aki, parlamentario di Partido di Pueblo Arubano AVP a haci un advertencia serio. Mirando e desaroyonan di e ultimo shete aña pa cu maneho di desperdicio, e ta kere cu den apenas un par di luna, nos isla lo por conoce un desaster ecologico y di salud. El a bisa esey durante e conferencia di prensa semanal di e partido, argumentando e decisionnan robes, un tra’i otro, cu Gabinete Wever-Croes I y II a tuma y te dia di awe ta nenga di acepta, corda pa corigi.
For di ex minister Otmar Oduber, pasando door di Marisol Tromp y Evelyn Wever-Croes te na e actual Minister di Medio Ambiente, Ursell Arends; parlamentario Sevinger a indica cu tur a ignora algun of tur estudio y conseho cu gobierno di AVP a laga atras for di 2017. Den cada stap di e caminda, Sevinger a purba di alerta y adverti e mandatarionan di nan fout, sinembargo a tuma decision pa beneficia financiado di campaña, cu tur consecuencia cu awo ta cay riba lomba di e ciudadano.
Referiendo na Minister actual Arends, Sevinger a bisa cu “unico cu e mester a haci ta repasa e estudionan existente, tuma decision y pone placa su tras. A scoge otro y awe por mira cos a bira pio, e contribucion di e ciudadano a bay di 25 pa 40 florin, dump a lanta den tur skina rond di e isla y no por haci nada ainda cu RWZI.”
Loke cu Minister Arends ta bati na pecho cu ne, esta cu e ta esun cu a cera dump, ta en realidad un mentira y su blunder di mas grandi. Pasobra, pa cuminsa, ken cu ta por pone un candal na e porta, pero esey no ta e solucion. Ademas te dia di awe truck cu sushi ta drenta tur dia for di hospital, for di RWZI y cu asbest.
E insinerado ta un cu tabata sa cu no ta cumpli cu e capacidad cu Aruba mester y awo el a daña tambe. Unda tur e sushi ta bayendo e ora? Gobierno a duna ordo pa hinc’e den container cu ta acumulando riba tereno di Parkietenbos. Pa e sushi sigui stoba eyden y creando tur sorto di gas toxico.
Cu prueba den man, esta lesando un carta di e comision di februari 2018, e parlamentario di AVP a mustra con Gabinete Wever-Croes I y II sistematicamente ta ignora, te dia di awe, tur conseho cu ta haya pa atende cu maneho di desperdicio. A neglisha incluso e conseho pa no aumenta e prijs pa servicio di pikimento di sushi.
Tampoco a duna oido ora Serlimar a bisa cu cerando Parkietenbos, e cantidad di sushi pa e insinerado lo triplica. Sevinger ta cuestiona si ta hustamente esey tabata kier pa awo e mesun compania, sin destaho publico atrobe, cumpra dos mas. Shete luna mas laat, tur cos ta mescos.
Sevinger: “Fuera cu MEP a haci un desaster cu e pais, e ciudadano tin di puntra su mes y reflexiona riba kico ta loke partido RAIZ a haci pa Aruba. Mientras tanto ta paga mas pa tira sushi afo, ta paga mas pa chica pos door di no por soluciona e situacion na RWZI y den Conseho di Minister na luga di discuti riba idea y alternativa, ta discuti con ta bay parti e suma cada bes mas grandi cu kier ranca for di e cartera di e turista pa drecha loke nan maneho sin vision mes a ocasiona.”
