Ta tempo pa como mayor habri wowo, pasobra e sistema di mundo ta treciendo hopi cambio, cu ta contra boluntad di Dios. Cosnan cu Dios ta desaproba y aborece completamente y cu hopi ta apoya pa complace cu hende y lubida riba Dios.
Den e buki Josue Capitulo 24 completo Josue ta papia di esey, y cu alctualmente hende ta biba un pia serca Dios y un pia den e mundo, y esey no ta boluntad di Dios. Den 2 Cronicas capitulo 7 vers 14+15 , Dios ta haci un yamada na su pueblo, esey ta nifica e pueblo cu ta para na banda di Dios, tanto cu palabra como hecho, y cu ta duna fruta di nan fe den Dios. Un pueblo cu ta constantemente den presencia di Dios, y cu ta reconoce cu Dios ta Todopoderoso y ta capaz pa supli nan necesidad.
Cada biaha cu nos aproba locual Dios ta desaproba nos ta den rebeldia cu Dios. Tur pais na mundo caminda cualkier ley wordo aproba contra e boluntad di Dios e pais ta den rebeldia contra Dios, y e lo tin su consequencia. Pasobra e cambio di ley ta habri porta pa e pueblo por peca contra Dios. Awor nos ta biba den un tempo cu Dios ta wordo poni un banda pa hende por haci locual cu nan kier.
Awor e pregunta ta: For di ki dia e creacion ( criatura) por bira mas importante cu e Creador ? (Romanonan capitulo 1 vers 18 +32)
No ta tur cos cu e Sistema di mundo ta aproba , abo como Mayor por permiti den bo cas, pasobra nos ta den tempo trabahoso, cu hende ta chercha Dios, pa complace cu hende, sin corda cu nan ta lanta furia di Dios (Romanonan capitulo 2 ver 5 +6+7+8). Corda bon ta para scirbi den e buki di Hebreonan Capitulo 12 vers 14 : Aspira pa tin pas cu tur hende , y santificacion, sin cual ningun hende lo mira Señor.
Ta kico a pasa cu hende ta lubida riba promesa di Dios. Jeremeias 29 vers11 ta bisa : Pasobra mi sa e plannan cu mi tin pa boso, Señor ta declara , plannan pa pas y no pa calamidad, pa duna boso un futuro y un speransa. Anto boso lo sclama na Mi y bin haci oracion na Mi y lo mi scucha boso. Lo mi laga boso hañami Señor ta declara.
Romanos Capitulo 8 vers 1: Pesey awor no tin condenacion pa esnan cu ta den Cristo Hesus, Cristo a condena pica den carni, pa e exigencia di ley por wordo cumpli den nos , kendenan no ta cana segun e carni,ma segun e Spirito. Nos conseho na cada mayor ta : Drecha bo relacion cu Dios abo y bo famia, pasobra nos ta den tempo trabahoso ( 2 Timoteo 3 vers 1-9) y tin mas bagamunderia y cosnan extravangante cu ta bay contra e Palabra di Dios na caminda.
Wak pa abo y bo cas ta salba y cubri bao di sanger di Hesus. Pastor Marcel Balootje.
