Durante di un conferencia di prensa yama na ultima ora pa e contratista OHL Arellano, cu ta encarga cu e proyecto di hospital, nan kier a duna nan banda di medaya pa loke ta e ultimo incidentenan cu a tuma luga.
Jeffrey Shaheen, Manager-Director di OHL Arellano, a comenta durante e rueda di prensa cu a tuma luga na Kowloon dialuna atardi, cu nan ta operando na Aruba desde 2014 den un contract cu SOGA. E sosten ricibi for di SOGA y tur e subcontratistanan local tabata tremendo, el a comenta. Nan ta orguyoso di por a entrega un facilidad nobo y moderno na e comunidad di Aruba.
Ta nan maneho pa no interferi cu politica local y nan no tabata kier a responde na ningun cobertura di medionan te na e fecha di cumplimento di nan Proyecto. Pero nan mester a defende nan nomber contra acusacionnan falso cu a wordo publica ultimamente.
OHL ta un empresa multinacional cu ta opera den mas di 30 pais. Na nivel local, nan ta un subsidiario di e propiedad total di OHL USA Inc. OHL tin un experiencia extensivo den construccionnan di cuido y tambe hospital tanto regional como internacionalmente. E team local ta consisti di profesionalnan di construccion habil cu experiencia extensivo den construccion di cuido.
Riba diabierna, dia 20 di september, 2019, un evento hopi lamentabel a sosode na Hospital dr. Horacio Oduber, caminda cu un storm water pipe a los y a saca e awa di yobida for di e bed tower nobo den e departamento di emergencia. Despues di un investigacion extensivo pa asina determina causa di e accidente, tabata tubonan geplug cu ta forma parti di e compleho existente di e hospital.
Mientras cu a colecta e awa di yobida, esaki no tabata tin ningun caminda pa bay y a keda acumula den e tubonan te ora cu nan no por a wanta e presion mas y a los. E tubonan en cuestion ta riba 26 meter di altura y tambe mester a contene tur e awa cu el a colecta riba dak di e edificio. Buscando asina e causa tabata tin varios luga geplug (pega) identifica den e sistema di drenahe existente.
- E fluho di salida tabata completamente cubri cu yerba, mata y santo. E awa di e yobida no por a pasa libremente.
- E drain trench construi pa desvia e awa di yobida tabata completamente cubri cu mata y tabata geplug. Awa di yobida no por a pasa libremente.
- E saliña caminda cu e awa ta bay ta completamente cubri, loke ta dificulta e fluho liber di drenahe.
- Tin un obstruccion significativamente na final di e drain existente na e extremo west di e actual hospital.
- Tin un obstruccion significante den e drain principal dilanti di e entrada principal existente. Hospital ta responsabel pa mantene tur e areanan aki. Nan no a wordo manteni. E falta di mantencion a causa e incidente extremadamente desafortuna, el a splica.
Cobertura reciente di medionan di comunicacion
Tabata tin un cobertura mediatico reciente cu tabata sensacional y falso. E proyecto aki a wordo lamentablemente politisa. Por lo tanto, nunca OHL a responde na e cobertura di e proyecto aki den medionan local te cu dialuna. Gerencia di Arellano a probecha di e oportunidad pa aborda hopi reclamo falso cu a informa y proporciona informacion obhetivo.
SOGA a contrata OHL bao di un contract di e buki cora di FIDIC pa construi solamente. Esaki ta nifica cu simplemente nan a construi loke nan ta contrata pa construi y a traha directamente pa SOGA. OHL a ricibi un diseño integral y un conhunto di standartnan pa construi. OHL a mantene tur man di obra y e materialnan di e edificio di acuerdo cu e specificacion y rekisitonan di nan contract cu SOGA. Tur e materialnan a manda y aproba prome cu nan adkisicion y instalacion y tur trabao ta wordo revisa, aproba y acepta pa SOGA.
SOGA di su banda ta ricibi e revision y aprobacion di e Gobierno di Aruba y di hospital pa tur e trabaonan entrega. OHL semper a desempeña di acuerdo cu e specificacion y rekisitonan di e contract y ta orguyoso di e instalacionnan nobo cu a keda entrega,
Na inicio di e contract, OHL a compromete na uza e mayor cantidad di trahadonan local posibel. OHL ta orguyoso pa bisa cu solamente tin un subcontratista di exterior y cu ta uza trahadonan local pa e instalacion. Apart di esey, tur e demas subcontratistanan ta empresanan local di Aruba. Actualmente tin mas di 150 trahado local den e proyecto aki. Den e ultimo 5 añanan tabata tin cientos di trahado di Aruba, trahando den e proyecto aki. Cualkier atake na e obranan ta un atake directo contra e excelente companianan aki y e personanan di Aruba, cu a crea un excelente ekipo for di comienso di e proyecto aki.
Tabata tin afirmacion cu OHL no tin experiencia den construccion di hospital. E reclamo aki ta completamente falso. OHL y e ekipo na e sitio tin miyones di meter cuadra di experiencia den e construccion di hospital, tanto na nivel regional como internacional.
A afirma cu a uza materialnan inferior y cu e trahadonan ta deficiente. E afirmacionnan aki ta completamente falso. Tur e trabao a wordo proporciona y realisa di acuerdo cu e specificacion y rekisitonan di e contract.
Tur e material y trabaonan a wordo inspecciona y aproba prome cu su aceptacion, manera cu a indica anteriormente.
Tabata tin keho riba problemanan constante den e construccionnan nobo. Manera cu a indica anteriormente, OHL a construi y entrega tur obra di acuerdo cu e contract. Tur e problemanan cu a menciona por a demostra na SOGA como resultado di e falta di mantenimento y/of eror di uzo. SOGA no a disputa ningun di e hayasgonan aki. Ademas, tin varios area cu no ta dentro di e alcance di e contract aki. E areanan aki ta den mal estado y falta di mantencion adecuado. A haci e referencia incorecto na OHL na e areanan aki cu ta pafo di e contract.
Tambe tabata tin keho cu e construccion tabata tardando demasiado y e construccion aki lo costa mas despues. OHL a construi loke a contrata pa construi. E costonan operativo y e costonan di mantenimento ta completamente pafo di nan alcance. E vinculacion di OHL na e costonan operativo futuro ta incorecto. Cu respecto na e tempo, tabata tin cambionan significativo den e alcance di e trabao, ta tur locual el a splica.
