Riba noticia internacional, a sali un noticia di Aruba Airlines, cu hendenan a keda pega aki bao, cu tin un grupo grandi di Cubano, etc. Frank Arends a splica cu diasabra ultimo a haya un problema mecanico cu nan avion cu nan no por a sigui pa Havana e mesun dia y mester a atrasa e vuelo, te cu el a bira un poco laat den anochi cu mester a cancela e vuelo te pa su otro dia. Den e mesun momento a transporta e hendenan aki pa hotel. Apesar cu na Aruba tabata tin poco cupo disponibel. A logra di ubica nan tur. Ta 118 pasahero nan tabata. Tur ta nacionalidad Cubano. A haya autorisacion di imigracion pa nan por a keda den transito, esta mester saca nan mas pronto posibel. A resulta cu diadomingo tambe e avion a keda na tera, pa motibo di piesa. No por a haya piesa, aunke cu na final a haya nan si. Dialuna a cuminsa traha riba e avion cu finalmente por a keda cla cun’e y cu el a sali diamars.

Tur e hendenan aki a wordo sirbi bon. E atencion tabata tey 24 ora. Aruba Airlines tabata tin su trahadonan na e hotelnan, unda cu e hendenan tabata hospeda. Kico nan tabata tin mester, tabata tey, pa por sirbi nan loke nan tabata tin mester.

Automaticamente esey ta fuera di locual cu nan ta haya na hotel. Si nan tabata tin mester algo otro cu no por a haya na hotel, tabata eynan pa busca e cosnan pa nan. Finalmente diamars, esta ayera, e personanan aki a wordo hiba bek na aeropuerto y a keda cla cu e avion den careda di 10’or di anochi. Nan a haya OK pa bula bek pa Havana y a sali cu e hendenan aki net 1 minuut prome cu 12’or di mey anochi. A push back for di gate y 6 minuut despues di 12’or, a lanta rumbo Havana, Cuba.

Informacionnan eroneo

Segun Arends, e tambe a mira e video online y no ta 100% berdad. Nan ta papia di maltrato, cual no ta berdad. Tabata tin alternativa, pero no tabata por. No ta tur compania aereo por a haya cu por a drenta e pais. Ta trata aki di un pais cu bo mester tin permisonan di lunanan prome, si bo kier haci un vuelo y no ta asina asina bo por busca un aerolinea, mescos cu e otro paisnan manera Merca, Sur America, e otro paisnan cu bo por bay sin ningun otro problema, bo ta charter un avion, hiba nan y bo ta cla. Esaki no. Bo mester tin hopi permiso cu mester wordo pidi simannan, por ta lunanan prome y esey tabata e problema cu mester a warda te ora cu nan a drecha e avion pa por a bula nan. E noticia cu a sali di e reportero cu a entrevista e persona en cuestion, no ta 100%. A duna bon atencion, hopi bon servicio, nan a come bon, nan a bebe bon, nan tabata keda den nos hotelnan di cinco strea y nan tabata contento. E noticia a cay hopi duro pa e aerolinea ora cu a mira esaki. No por a kere esaki, segun Arends.