Aleluya, tin hopi cu no ta kere, tin hopi cu no kier kere. Pero Dios no kier pa ningun hende bay perdi. (1 Juan 3 vers9) ( Mateo 24 vers 44 ) ( 1 Pedro 4 vers 7) (Revelacion 22:12).
Nos tin sigur di Su binida, pasobra e ta para scirbi: Juan Capitulo 14 vers 1+2+3+4 ta bisa : No laga boso curazon bira intrankil, kere den Dios y kere tambe den Mi, den cas di Mi tata tin hopi lugar di biba, si no tabata asina lo Mi a bisa boso.Pasobra Mi ta bay prepara un lugar pa boso ,Y ora Mi bay y prepara un lugar pa boso , lo Mi bin atrobe y ricibi boso serca Mi , pa caminda Ami ta boso tambe por ta. Y boso sa unda Mi ta bay y e caminda boso sa.
Asina Hesus a papia cu e Apostol nan , pero awor nos tur cu ta kere y biba pa Señor sa cu mes un mensahe ta conta pa nos tur.Pasobra Hesus ta e caminda di berdad y e bida.
Dios a demostra cu semper e ta saca su pueblo prome cu destruccion tuma lugar.
Den Genesis Capitulo 6 Dios a bisa Noe traha e arca pa asina Dios libra Noe y su famia for di e diluvio.
Den Genesis Capitulo 19 Dios a manda angel saca Lot for di Sodoma y Gommora prome cu e a destrui e cuidad.
Den Juan capitulo 3 vers 16, Dios ta splica cla y raspa con henter mundo por yega na salbacion y bida eterna den Cristo Hesus.
Awor den e tempo cu nos ta bibando,Mateo Capitulo 24 completo ta mustra nos cu nos Salbador Cristo Hesus ta na caminda.
Pero E a priminti di no laga su pueblo desampara, y un biaha mas e lo saca su pueblo pasobra e ta para scirbi.
1 Thesalonisenses Capitulo 4 vers 15-18 ta bisa lo siguiente: Pasobra esaki nos ta bisa boso pa medio di e Palabra di Señor , nos cu ta bibo y cu ta keda te na e Binida di Señor lo no bay dilanti di esnan cu a muri.
Pasobra Señor mes lo baha for di cielo cu un grito , cu bos di archangel y cu trompet di Dios, y e mortonan den Cristo lo lanta prome .
E ora ey nos cu ta na bida y cu a keda lo wordo tuma den e nubianan hunto cu nan pa contra cu Señor den laira, y asina nos lo ta semper cu Señor , Pesei consola otro cu e palabra nan aki.
Hesus ta bin busca tur esnan cu ta kere den djE y biba pa E y nos mester para firme cu bista riba Galationan 5 vers 19-22 y Hebreonan 12 vers 14 , pasobra Dios su Palabra no ta cambia.
Y si awe bo a lesa e mensahe aki no haci bo curazon duro, arepenti di bo picanan abo y bo famia y acepta Señor Hesus Cristo como bo Salbador .
Corda bon cu ningun hende sa e ora di e binida di Cristo Hesus.
Nos ta sigur di e binida di Cristo Hesus. Pastor Marcel Balootje.
