Dialuna mainta a tuma luga un encuentro publico (OB), un reunion informativo yama p’e minister di economia presenta e desaroyo di varios proyecto selecta den cuadro di landspakket economicamente..
Gerlien Croes, miembro di fraccion di AVP, a comenta cu e minister a presenta e proyecto number un, cual ta pa agilisa e sistema di permiso, ora cu tin cu haci un peticion pa haci negoshi, pa crea un loket digital p’e proceso aki.
E parti tambe di entre otro habri un cuenta di banco y tambe un Aruba Fair Trade Authority.
E pregunta esencial ta, fraccion di AVP ta keda preocupa riba e hecho unda cu e minister a drenta parlamento como manager, presenta e trabao cu Hulanda a haci.
Unda cu e pregunta ta cuminsa bira interesante di parti di parlamento, ta bin cu cuater proyecto cu ta cay bao di landspakket. Ta cuater punto cu Aruba tin varios aña reto cu ne, di 150 punto cu a bin door di ‘Doorlichting’. Pregunta tabata con a yega n’e cuater puntonan aki. E presentacion di dialuna tabata riba landspakket, pero con, e minister mes cu su maneho, ta kere cu ta bay desaroya den liña di loke e ta haci cu landspakket, e maneho economico na Aruba.
Ora cu e preguntanan aki a bin dilanti, por tende cu no t’e maneho economico a bin presenta. “Cuater punto di landspakket no ta bay soluciona e problema economico, ni tampoco diversifica economia di Aruba,” Croes a comenta.
Croes a splica cu, como manager di landspakket, Wever a bin presenta loke Hulanda a haci. Pero pa ta realistico, dos pa tres aña largo lo bay traha riba e proyecto di vergunningstelsel, habri cuenta di banco. Si e ministernan coopera, ta bin cu sistema digital con ta pidi vergunning. E minister a menciona cu mester bay pidi cu e tabata bao di e comprondemento ora cu a firma COHO, cu nan a bisa cu nan lo yuda cu financiamento. Door cu e ta bay areglo ey, ta bay manda un carta Hulanda y pidi mas di 680 mil, pasobra e Aruba Fair Trade Authority lo costa Aruba 680 mil y despues na 2023 e mester bin den Aruba su presupuesto.
E pregunta ta keda si Hulanda no duna 280 mil ey, con ta para cu e proyecto e ora. Ken si ta duna esaki. Unda ta haya e placa, Croes a puntra.
Pa un cobertura mas amplio lesa TREMPAN.
