Dialuna mainta den un encuentro publico den sala di parlamento, Minister di Asunto Economico, Comunicacion y Desaroyo Sostenibel Geoffrey Wever a bin elabora riba e cambionan structural cu lo mester tuma lugar pa cu reforma economico. Esaki ta mara na e acuerdo cu Minister President a firma 13 di november 2020, caminda cu entre Aruba y Hulanda (Minister Evelyn Wever Croes y secretario di estado Raymond Knops) a wordo firma pa cumpli cu e Landspakket cu a desenboca den e trabounan cu tin cu haci. E mandatario a bin splica riba su parti cu ta e reforma economico.
E rol cu parlamento tin den esaki, ta cu e cambionan cu lo tin cu bin den e landspakket, tin algun cu ta rekeri cambio di ley. Pa loke ta e COHO cu ya caba a wordo aproba pa e minister president di e paisnan den reino, esaki tambe lo mester bin den parlamento di e diferente paisnan.
E cambionan cu lo ta rekeri pa parlamento di Aruba haci , unabes cu esaki bin parlamento, ta toca entre otro leynan di LTU, leynan di “bouw en woning verordening” “uitgifte eigendommen”, en corto, asuntonan cu tin di haber cu e proyectonan cu por stimula economia.
Nos tur sa cu hopi biaha tin kehonan cu e proyectonan ta tarda of cu e proceduranan no ta transparente. Mescos ta conta pa e permisonan cual recientemente tabatin varios discusion entre ministernan ya cu nan no ta riba un linea.
Tur esakinan ta puntonan cu lo mester wordo discuti y debati, pa keda ancra den mihor procesonan. Asina e minister a splica awe.
Pa parlamento esaki ta nifica cu si tin cambio di ley, esaki lo tin cu refleha tambe su consecuencianan den nos presupuesto di pais Aruba y mester tin placa presupuesta tambe pa esaki pa e por wordo efectua.
Parlamento a haya un presentacion hopi amplio y tabatin oportunidad pa haci pregunta na minister riba loke e la presenta. Consecuentemente tin algun rapport cu lo bay sali cu lo delinea hopi mas extenso riba kico ta e meta y kico tin cu bay sosode. E ora ta keda na parlamento pa bay trata nan. Asina e Lider di Fraccion di MAS Lopez Tromp a termina bisando.
