Tin varios yamada a drenta for di dialuna atardi pa anochi, riba un preocupacion cu tin na San Nicolas den cierto area. E awa tabata sali blanco manera lechi y esey a trece preocupacion cu a bati alarma.
Rigo Raghunath kende ta chef proyecto y actualmente hefe di departamento di mantenimento, operations y project di distribucion di awa, a splica cu e awa a sali cu un tiki color. E hecho ta cu e awa no tabata lechi. Tabata tin storing cu ta cosnan cu ta caminda un valve a kibra, na caminda grandi.
Departamento di mantenimento a bay haci e trabaonan necesario pa bay drecha e situacion y na momento cu a bay haci e trabao, ta haya aire cu ta drenta den e sistema. Una bes cu a caba cu e trabao, nan a habri e liña bek. Keto bay aire ta keda den e sistema. Nan a spula e liña basicamente na hidrantenan. Pero semper bo ta haya aire ta scapa bay na e percela. El a bay na e cas, cu consecuencia cu e cliente no tabata na cas e momento ey y ora el a yega cas, el a habri e cranchi y ta haya un mescla di aire bao di presion. E awa ta bin duro su tras cu presion. Esey a haci cu bo ta haya awa troebel.
E momento cu el a habri e cranchi ta haya e mescla di a awa bao di presion y ta duna un color blanco. Si e cliente a tuma un rato den e glas, e lo a ripara cu e awa lo a bira blanco bek. Ta e awa cu nos tur ta bebe y practicamente aloke a saca for di cranchi ta awa bebibel sin aire den e sistema. Na momento cu haya awa blanco, ta troebel water. Esey ta indica cu tabata tin un trabao den e area eynan. Un trabao di mantenimento cu por tin esey como consecuencia. Pero no ta dañino pa pueblo.
Con mester mir’e
Segun Raghunath, si bay bisa e cliente cu e tin cu habri su cranchi y lag’e spula bay, e cliente ta cuestiona e ora ken ta paga pa e awa cu bay perdi. Ta conseha e ora pa yama WEB y laga tecniconan mes bay atende cu e situacion. Si tin un cas cu full e sistema tin aire den dje, e tecniconan sa kico ta haci sin cu e cliente ta keda carga cu e gasto.
Keho
Te cu asina leu no a haya ningun keho na WEB. No tin motibo di preocupacion, segun Raghunath. Na final di tubo di cas tin aire, y despues awa ta biniendo su tras. Tanten cu no habri e kranchi, e aire ta keda den e sistema. Si un cliente a yega cas y a habri su cranchi y si ripara cu e awa a sali blanco, no ta motibo pa drenta den panico. Yama WEB y nan lo atende e caso. WEB tin e personal adecua cu sa kico pa haci.
Kico ta haci
Basicamente nan ta spula. Ta habri un cranchi, laga awa bay, pa asina ta sigur pa laga e aire sali for di e sistema. Tur hende por drumi trankilo.
