E compania di petroleo Spaño, REPSOL, a cuminsa drill un pos di exploracion na e costanan pazuid di Aruba na juni ultimo. E pos a haya e nomber di Lagadishi. A uza e drillship West Capella pa e trabou grandi aki. E ta un di e 4 posnan cu a señala cu posiblemente lo por tin petroleo of gas. Sin embargo, despues di a inverti miyones pa e boramento aki, no a topa ni cu petroleo y ni tampoco cu gas den suela di Aruba.
REPSOL a firma un acuerdo cu e drillship pa perforacion pa un suma di no menos di 6,4 miyon di dollar Mericano. Prome cu e trabou na Aruba, e mesun “drillship” aki a traha tambe na Gabon, unda a realisa un descubrimento di petroleo na April. West Capella ta un drillship di awa hundo di 6 generacion cu diseño Samsung 10,000, traha pa Samsung Heavy Industries na aña 2008.
Te ainda REPSOL no a indica si lo opta pa bora mas pos di petroleo. Den e acuerdo cu nan tin firma cu Compania Arubiano di Petroleo (CAP), ta referi cu lo bira por lo menos un pos di petroleo. Asina mes nan tin e opcion pa bora entre e 3 otro posnan cu tambe nan ta pronostica cu lo por tin petrolero den suela. Claro cu e decisionnan asina no ta cay facil, debi cu e gastonan mara na cada boramento ta hopi halto.
Fuentenan a indica cu si tuma e decision pa sigui bora, cu lo opta pa check e pos cu nan a duna e nomber di Bonbini. Ta spera cu e prome kwartaal di aña 2019 lo sa si REPSOL ta opta pa haci e inversion ey, den un esfuerso pa explora si Aruba tin petroleo den nos subsuela.
For di inicio di 2010 a traha cu diferente expertonan internacional renombra riba un “fact finding pathway”. Durante 2010 pa 2012 a evalua via diferente proceso transparente, interesadonan pa bira un partner cu Aruba den exploracion pa gas y azeta den nos subsuelo. Na 2012 a selecta y a firma cu e companianan Repsol di Spaña (operador) y Total di Francia.
Na 2013 a haci e asina yama “2D seismic”, mas o menos 3.500 line km. Na cabamento di 2014 y inicio di 2015 a haci e asina yama “3D seismic”, mas o menos 3.000 km2. Na 2015 a haci un e asina yama “Piston coring and heat flow survey” den e zona interesa.
Durante 2013 y te cu pa final di 2016 y inicio di 2017 tabatin un cantidad di procesamento di data y a tuma luga e fase di interpretacion di nivel detaya dor di expertonan y mas profesional. Na 2017 a tuma e decision pa bay pa e siguiente fase cu ta perforacion di prueba y a cuminsa for di 2017 cu e proceso pa ingenieria di e asina yama “well construction process” y sigui cu e preparacionnan pa e asina yama “drilling of exploration well 2018”.
