E president Nicolás Maduro a anuncia dialuna cu e prijsnan di gasolin na Venezuela lo eleva e nivelnan internacional pa resolve e deformacion cu e ta provoca, ya cu “practicamente nos ta regal’e”, y esey ta subsidia e habitantenan durante dos aña.
“Mi ta aspira cu den dos aña mas tarda nos lo resolve e iregularidad,” e gobernante a bisa den un discurso televisa. “Gasolin y ‘hidrocarburos’ mester pone nan na e prijs internacional pa asina termina e contrabanda pa Colombia y paisnan den Caribe.”
E gasolin di Venezuela, e mas barata di mundo, ta un tema hopi sensibel desde 1989, na momento cu a destaca un rebelion popular na rais di un crecemento di combustibel cu e president di e tempo ey Carlos Andrés Pérez a ordena. Mas o menos 300 persona a muri. Maduro a indica cu den e proximo dianan lo anuncia e detayenan di e prijs nobo di ‘hidrocarburos’ y di un subsidio direct cu lo ta vigente pa dos aña, ora cu a aspira di ta recupera y establece e economia di e pais.
Na februari 2016, despues cu e prijsnan tabata gevries casi dos decada, e mandatario a aumenta e gasolin pa un bolivar pa liter. E actualidad ta cu e crecemento ey no ta pasa di ta algo simbolico, mirando cu e ta ekivalente na un cantidad chikito di e tipo di cambio di mercado negro, uza ampliamente pa falta di capacidad di gobierno pa satisface e demanda di divisa.
Maduro –kende cada bes a reconoce e estatal Petróleos de Venezuela S.A. (PDVSA) ta perde varios mil di miyon di dollar anual p’e diferencia na loke ta costa produci gasolin y e prijs di benta- a resalta cu ta calcula “18.000 miyon di dollar di perdida p’e contrabanda di gasolin cu ta bay pa Colombia y Caribe.” Esey y otro medidanan ta forma parti di un programa di “recuperacion, crecemento y prosperidad economico” buscando pa enfrenta e crisis severo cu ta ansiedad p’e Venezolanonan, marca p’e escasez di productonan basico y un inflacion yegando miyon porciento na final di e aña aki, segun e calculacion di Fondo Monetario Internacional.
Maduro a ratifica dialuna cu dia 20 di augustus lo drenta na vigencia un reforma monetario complementando e eliminacion di 5 cero na e bolivar, parti di e esfuerso di su gobierno pa combati e inflacion y escasez di placa na Venezuela. E unidad monetario nobo, denomina ‘bolivar soberano,’ ta implica e eliminacion di e actual denominacionnan di 1.000, 2.000, 5.000, 10.000, 20.000, 50.000 y 100.000 bolivar, cual Maduro mes a pone den circulacion entre 2016 y 2017 pa reduci un parti e crecemento inmenso di prijsnan.
Awo lo uza un moneda di 50ct y uno di 1 bolivar, ademas di ocho diferente placa di papel pa cada un di e siguiente denominacion: 2, 5, 10, 20, 50, 100, 200 y 500 bolivar, el a informa. Maduro a declara cu dia 20 di augustus “no ta dia laboral” pa permiti e adaptacion p’e entrada di e placanan nobo, cual ta bay ‘coexisti’ cu e placanan di papel bieu durante un tempo prudente. Sin duna detaye, e mandatario tambe a señala cu Venezuela “lo bay tin dos unidad contabel,” uno cu e ‘bolivar soberano’ y e otro desde e prijs di petro, e moneda digital respalda pa su gobierno, cual prijs ta determina e acuerdo di balor di canasta petrolero Venezolano. Su uzo lo ta obligatorio pa PDVSA, el a señala.
