Durante di su bishita na Leeuwarden, Minister Plenipotenciario mr. Ady Thijsen a bishita NHL Stenden Hogeschool, cu ta un integracion entre NHL Hogeschool y Stenden Hogeschool. NHL Stenden ta profila nan mes hopi internacional cu establecimento na Sur Africa y na Bali, Indonesia. Tambe nan ta forma parti di e programa di intercambio Erasmus y alabes NHL Stenden ta otorga beca pa intercambionan internacional. Un punto positivo di NHL Stenden ta cu nan ta ofrece Student Stay pa e maximo duracion di 1 aña. Na e momento aki no tin indicacion cu tin studiantenan cu problema pa haya camber.
Durante di e bishita y e combersacion cu Erica Schaper (via zoom), presidente di e Raad van Bestuur a bin dilanti cu NHL Stenden y Aruba tin un relacion estrecho, specialmente riba e tereno di “Hospitality Management” hunto cu EPI y Universidad di Aruba. Tambe NHL tin un bon cooperacion cu hotelnan na Aruba unda cu nan studiantenan por core stage. Otro punto interesante cu a keda trata ta e cooperacion entre NHL Stenden y Hogeschool van Hall Larenstein riba e tereno di estudio di agricultura.
Na e momento aki tin un proyecto “Voedsel in groen Caribisch Nederland” na St. Eustatius conhunto cu un partner Mericano. Tambe e cooperacion aki ta enfoca riba gastronomia, nutricion y cria di cabrito. Hogeschool Van Hall Larenstein ta specialisa riba estudio di agricultura.
Minister Thijsen a keda impresiona cu e desaroyo aki y a bisa cu esaki por brinda expectativa pa Aruba riba desaroyo di e sector di agricultura. E mandatario a bisa cu Aruba su ambicion ta pa pone mas atencion den enseñansa di cuido. Kisas por mira na posibilidad pa un eventual partnership; un cross over entre estudio di cuido y Hospitality Management. Studiantenan di Hospitality Management di NHL Stenden den tempo di corona a yuda den hospitalnan y otro instancianan di cuido.
E meta lo ta pa crea un triangulo di cooperacion entre e ministerio di Enseñansa, e ministerio di Salubridad Publico y Arubahuis pa mas atencion den direccion di enseñansa pa cuido di ancianonan.
Minister Thijsen a bolbe subraya cu e pandemia a mustra Aruba cu e mester diversifica su economia, banda di e pilar economico principal di Aruba cu ta turismo. Pesey su persona ta hibando combersacionnan cu diferente municipionan y institutonan di enseñansa – tanto HBO
como Universidad – pa mira riba ki tereno por tin posibilidad pa cooperacion. Ta cu e vision aki cu, a haci e palabracion cu lo sondea posibilidad di cooperacion cu NHL Stenden.
Despues di e combersacion Minister Thijsen a haya un guia y splicacion di e facilidadnan di NHL Stenden, principalmente e sector hotelero y di cuido. NHL Stenden su seccion hotelero conoce un restaurant y un hotel, unda e studiantenan ta haya les y practica bou e mesun dak. Un concepto manera antes tabata Bushiri Hotelvakschool. Tambe e mandatario a haya e oportunidad pa conoce e sector di cuido di NHL Stenden.
Na final di e bishita, Minister Plenipotenciario mr. Ady Thijsen a gradici NHL Stenden pa e bunita recepcion y e informacion brinda cu sigur tin potencia pa cooperacion na bienestar di Aruba.
