Den e ultimo dianan, tanto na Aruba como Corsou ta hayando un ola di desembarke di personanan indocumenta, buscando manera pa drenta nos islanan. Poco poco nos ta mira e influx di Venezolanonan cu na final, ta wordo intercepta pa Kustwacht y despues manda bek na pais.
Na Corsou por lo menos 95 persona a keda deteni, di cual un so a haya e suerte di por keda eynan.
E informe riba e deportacionnan masivo di refugiadonan Venezolano for di tanto Aruba como corsou, ta causando preocupacion den Tweede Kamer di Parlamento Hulandes.
Parlamentario di GroenLinks Nevin Özütok a pidi pa un debate cu e Ministerionan di Asuntonan Interior y Relacionnan di Reino y Asuntonan Exterior.
E parlamentario a ricibi hopi poco apoyo pa esaki, pero hopi faccion si a apoya su solicitud adicional den un carta di e gobierno riba e tema.
GroenLink ta basa den informacionnan di abogado di migracion na Corsou cu ta papia di deportacionnan masivo sin un investigacion serio riba e peligernan cu e refugiadonan por ta exponi na Venezuela.
Özütok a ricibi apoyo pa su preocupacionnan di e parlamentario D66 Antje Diertens, kende a cualifica como “un tema hopi importante”.
Sinembargo e kier spera riba respuesta na e preguntanan parlamentario y tambe a señala e proximo IPKO na principio di januari na Corsou.
Pa Ronald van Raak (SP, ta un cuestion di principio cu Tweede Kamer no por responsabilidad pa e gobierno di Corsou.
E ta spera cu e ministernan analisa e situacion actual cu respecto e refugiadonan. Van Raak tambe kier sa si tin solicitudnan nobo di asistencia pa Corsou y Aruba y con Hulanda a responde pa esaki.
Mientras tanto, a anuncia cu e asistencia militar arma a wordo pidi pa Ministerio Publico na Corsou pa un periodo cortico, pasobra e baraknan ta sobrepobla y e Venezolanonan ta wordo reloca otro caminda.
E soldanan Hulandes y polis militar a wordo desplega pa monitorea e instalacionnan adicional te ora cu e Venezolanonan ta deporta.
24ora.com a tene un combersacion cu Parlamentario Özütok, kende a comenta di a pidi aclariacionnan riba e desalohonan for di Corsou. E situacion di Aruba tambe ta hinca den esaki.
Desafortunadamente, segun e parlamentario, tin poco apoyo di parti di Hulanda pa apela pa Aruba y Corsou riba con mester traha den e procedimentonan di asilo.
