CBS cu resultado di cifranan di importacion y exportacion tercer kwartaal 2019

156

Oficina Central di Estadistica ta presenta e resultadonan principal di e cifranan di importacion y exportacion, tercer kwartaal 2019. 

Importacion total Importacion total, den peso, a registra un subida di 1.3% den tercer kwartaal di 2019 (159.8 mln kg) compara cu e mesun periodo den 2018 (157.7 mln kg), den balor, ela subi cu 4.2% di Afl. 561.4 mln pa Afl. 584.8 mln. 

Importacion pa e area liber di Aruba* (peso) Importacion pa e area liber di Aruba pa e tercer kwartaal di 2019, a subi cu 0.6% di 157.4 mln kg na 2018 pa 158.4 mln kg na 2019. Durante e periodo aki diesun (11) di e bintiun (21) seccionnan a registra un subida den importacion den peso pa e area liber di Aruba. E subidanan mas grandi ta den e seccionnan “Ekiponan di transporte” (1.2 mln. kg), “Metalnan comun y trabounan deriva” (0.7 mln. kg) y “Obranan di piedra, gips, cement of asbest” (0.7 mln. kg). E caidanan mas grandi ta den e seccionnan “Palo, carbon y materialnan di palo” (-0.7 mln. kg). Ademas, caidanan a wordo registra pa e seccionnan “Animalnan bibo y otro productonan di origen di animal” (-0.6 mln. kg), “Productonan mineral” (-0.4 mln. kg), “Productonan vegetal” (-0.3 mln. Kg), “Materialnan pa fabricacion di papel y materialnan di papel” (-0.3 mln. Kg) y “Productonan alimenticio” (-0.3 mln. Kg). 

Importacion pa e area liber di Aruba* (balor) Importacion pa e area liber di Aruba pa e tercer kwartaal di 2019, den balor, a subi cu 2.2% di Afl. 553.9 mln na 2018 pa Afl. 565.9 mln na 2019. Diez (10) di e bintiun (21) seccionnan, a registra subida den importacion den balor pa e area liber di Aruba. E subidanan mas grandi ta den e seccionnan “Ekiponan di transporte” (Afl. 8.4 mln), “Diferente tipo di articulonan fabrica” (Afl. 7.9 mln.), “Metalnan comun y trabounan deriva” (Afl. 3.8 mln) y “Perlanan real y otro tipo di piedranan precioso” (Afl. 2.4 mln.). E caida mas grandi ta den e seccion “Productonan mineral” (Afl. -4.1 mln). Ademas, caidanan a wordo registra pa e seccionnan “Productonan alimenticio” (Afl. -3.3 mln) y “Productonan kimico” (Afl. -3.0 mln) respectivamente. 

E importacion pa e area liber di Aruba menciona anteriormente ta e resultado di Importacion via Lama y Importacion via Aire, cual tawata tin e siguiente efectonan: 

1. Importacion pa e area liber di Aruba* via Lama Importacion via di Lama pa e area liber di Aruba, den peso, a registra un subida di 0.5% den e tercer kwartaal di 2019 (157.4 mln kg) compara cu e mesun periodo den 2018 (156.7 mln kg), den balor, ela subi cu 1.9% di Afl. 464.8 mln pa Afl. 473.5mln. 

2. Importacion pa e area liber di Aruba* via Aire Importacion via di aire pa e area liber di Aruba, den peso, a registra un subida di 32.6% den e tercer kwartaal di 2019 (1.0 mln kg) compara cu e mesun periodo den 2018 (0.7 mln kg), den balor, tin un subida di 3.6% di Afl. 89.1 mln pa Afl. 92.3 mln. 

Importacion pa e area liber di Aruba* pa “Companianan grandi”** Importacion pa “Companianan grandi”, den peso, a subi cu 12.4%, di 23.4 mln kg den e tercer kwartaal di 2018 pa 26.2 mln kg den e tercer kwartaal di 2019, mientras, den balor, tin un subida di 5.7%, di Afl. 60.9 mln pa Afl. 64.4 mln. 

Exportacion total Exportacion total, den peso, a registra un subida di 1.1% den e tercer kwartaal di 2019 (4.7 mln kg) compara cu e mesun periodo di 2018 (4.6 mln kg), mientras, den balor, ela subi cu 18.9% di Afl. 29.8 mln pa Afl. 35.4 mln. 

Exportacion for di area liber di Aruba* (peso) Exportacion for di e area liber di Aruba, den peso, a registra un caida di 5.8% den tercer kwartaal di 2019 (3.9 mln kg) compara cu e mesun periodo den 2018 (4.1) mln kg). Diezcuater (14) di e bintiun (21) seccionnan, a registra un caida den peso den e exportacion pa e area liber di Aruba. E caidanan mas grandi ta den e seccionnan “Metalnan comun y trabounan deriva” (-0.5 mln kg), “Objetonan di arte, piezanan di coleccion y antiguedadnan” (-0.2 mln kg) y “Productonan alimenticio” (-0.1 mln kg). E subidanan mas grandi ta den e seccionnan “Materialnan pa fabricacion di papel y materialnan di papel” (0.5 mln kg) y “Makinaria y ekiponan electronico (nobo y renoba)” (0.1 mln kg). 

Exportacion for di area liber di Aruba* (balor) Exportacion for di e area liber di Aruba, den balor, a registra un subida di 7.2% den tercer kwartaal di 2019 (21.7 mln) compara cu e mesun periodo den 2018 (Afl. 20.3 mln). Shete (7) di e bintiun (21) seccionnan, a registra subida den balor den e exportacion pa e area liber di Aruba. E subidanan mas grandi ta den e seccionnan “Perlanan real y otro tipo di piedranan precioso” (Afl. 2.9 mln), “Makinaria y ekiponan electronico (nobo y renoba)” (Afl. 1.1 mln.), “Ekiponan di transporte” (Afl. 0.6 mln) y “Cuero di animal y otro materialnan di cuero” (Afl. 0.5 mln). E caidanan mas grandi ta den e seccionnan “Instrumentonan, aparatonan y ekiponan optico” (Afl. -2.1 mln), “Objetonan di arte, piezanan di coleccion y antiguedadnan” (Afl. -0.7 mln)” y “Metalnan comun y trabounan deriva” (Afl. -0.4 mln).