Prome Minister Evelyn Wever Croes tabata presente den e conferencia di prensa di Gobierno diabierna anochi unda a duna un update di e crisis di coronavirus.
Desde anuncio di e prome caso, a ked ana cinco caso raporta, di cual 3 ta ciudadano local y dos ta turista. Tur e pashentnan ta den bon estado di salud.
E mandatario a bisa tambe cu no tin mucho cos nobo pa raporta, pero si a ripiti decisionnan tuma. A enfoca riba e tique de queda cu ta valido di 9’or di anochi pa 6’or di mainta. E negoshinan mester cera pa 8’or di anochi y nan tin un ora pa yega cas prome cu e toque de queda cuminsa.
A repasa e procedura di pidi excepcion of inscribi si tin personanan cu pa motibo di trabou mester ta riba caya. A bisa cu esey ta conta pa prensa tambe.
Na mesun momento a bisa cu den dia no ta keiro tampoco. Si mester bay supermercado, no bay cu famia, sino individualmente. No aglomera, e mandatario a pidi. Tur esaki ta pa evita cu e virus no ta plama demasiado lihe, pa motibo Aruba su sector di cuido lo no por handle esaki.
Entrante diasabra ningun residente por drenta Aruba mas. Tin grupo cu ta keda pega den exterior, el a urgi pa tuma contacto cu ATA na su number di emergencia, pa asisti e hendenan e periodo cu nan ta keda pega den exterior. Mester yama pa pone nomber riba lista.
Otro punto cu a papia di dje ta cuarentena. Awo tin 381 persona den cuarentena di esaki 65 persona cu tabatin contacto cu e personanan cu a test positivo. Tin 316 persona den cuarentena cu a yega Aruba e siman aki y a haya ordo pa bay den cuarentena. E prome grupo di cuarentena ta mas riguroso.
Un siman cu Aruba den e gara di coronavirus na Aruba, tin 381 persona den cuarentena.
Awo ta drenta e siguiente fase, unda ta cera Aruba ya cu ningun hende por drenta mas y ta bay controla localmente pa evita cu e virus ta sigui plama. E mandatario a bisa cu ta trata di decisionnan profundo cu ta pa bienestar di tur hende y nan famia, y hasta perhudicando economia di Aruba. “Nos no kier pa loke ta pasa na otro pais, pas ana Aruba.”
Na mesun momento a anuncia cu den Tweede Kamer a pasa un pakete di emergencia pa Aruba.
