Autoridad di Sur Korea a informa cu 91 pashent, kendenan a kere cu no tin e virus mas, un biaha mas a test positivo di coronavirus. Jeong Eun-kyeong, director di Korea Centers pa Control di Enfermedad y Prevencion (KCDG), a bisa cu e virus por a “activa bek” na luga di infecta e pashentnan. Salubridad di Sur Korea a bisa cu no ta cla kico ta tras di e trend, cu ainda investigacionnan epidemiologico ta tumando luga.
E prospecto di personanan ta infecta bek cu e virus ta un preocupacion internacional, ya cu mayoria pais ta spera cu e comunidad infecta lo desaroya suficiente inmunidad pa preveni cu e pandemia bin bek. E cifra di Sur Korea a subi di 51 caso dialuna ultimo. Tin informa cu casi 7000 Sur Koreano a recupera di COVID-19, e casonan causa p’e coronavirus nobo.
“E number solamente lo subi, awo 91 ta e comienso,” Kim Woo-joo, profesor di enfermedadnan di infeccion di e Hospital Guro di e Universidad di Korea, a bisa. Jeong di KCDG a bin cu e posibilidad cu na luga cu pashentnan ta wordo infecta bek, e virus por a “reactiva”. Kim tambe a bisa cu pashentnan por a haya un “recaida” na luga di infecta bek.
Resultado falso di testnan tambe por tin, otro expertonan a bisa, of resto di e virus por ta den sistema di pashentnan, pero no ta infecta of peliger p’e anfitrion of otro. “Tin diferente interpretacion y hopi varia,” Jung Ki-suck, profesor di medicina pulmonario di Hallym University Sacred Heart Hospital, a bisa. Gobierno mester bin cu un contesta pa cada un variacion.
Sur Korea a raporta 27 caso nobo, e mas abou despues di casonan diario desde fin di Februari cu tabata mas di 900. Asina aki a yega na un total di 10450 caso y e cantidad di morto a subi cu 7 pa yega 211. E ciudad di Daegu, cu tabata e prome luga cu outbreak grandi di coronavirus pafo di China, a reporta 0 caso nobo pa prome biaha desde Februari. Cu almenos 6807 caso confirma, Daegu ta conta cu mas di mita infeccion total di henter Sur Korea.
E plamamento di infeccionnan den un misa na Daegu a pone cu e casonan na Sur Korea a cuminsa subi na final di Februari. E outbreak inicial a pusha e cantidad di caso confirma mas halto otro caminda pafo di China, prome cu e pais a uza testnan y medidanan di distancia social pa baha e cifranan.
