Marinierskazerne ta e base pa Goast Guard, nan ta cas di Marina Hulandes y tambe e Compania di AruMil. Pero den tur esaki e mas importante ta e laso cu Pais Aruba.
Diaranson, den un rueda di prensa na Mariniers Kazerne Savaneta (MKSAV), Comandante Tim van Wijk, a elabora riba e proyecto Sociaal Vormings Trayect (Trayecto Formacion Social Aruba). Esaki ta un di e proyectonan cu cual nan ta fortifica e laso cu Aruba y e ta un trayecto di Ministerio di Husticia y Asuntonan Social. E trayecto aki ta conta cu e apoyo di Mariniers Kazerne y ta resorta bou di AruMil, bou guia di Mayor Kelly y Sean Figaroa. Comandante na Mariniers Kazerne Savaneta, a sigui bisa cu na maart nan lo cuminsa c’un grupo nobo y tambe nan lo bin c’un di dos grupo femenino. Pa e grupo aki, ainda no tin suficiente candidato.
DEN FASE
Richard Kelly, Companie Commandant AruMil, a splica un poco di kico e Trayecto Formacion Social ta encera y kico por spera durante e trayecto, e trabou en conhunto, traha riba nan mes. E ta bay den fase. E prome tres simannan e hobennan ta keda paden y ta traha riba confiansa den nan mes y den nan ekipo. Durante nan fin di siman na cas, cu nan ta bay bek den sociedad eyfo. Nan mester anticipa tur cos y aplica e training cu nan a haya den nan opleiding, practica esaki bek den nan bida social.
Den e fase militar, cu ta dura cuater luna, nan ta haya disciplina, norma y balor, loke ta trata respet, con pa trata hende cu respet.
TRAYECTO FORMACION SOCIAL (SVT)
Na november e aña aki tabata di diesun aña di SVT. Y pa otro aña, manera Comandante Van WIjk a indica caba, nan tin pensa di cuminsa c’un grupo di mucha homber na maart. Y na augustus, e plan ta pa cuminsa c’un grupo di mucha muhe.
Jessica Ras, Coordinadora Formacion Social (SVT), a sigui bisa cu nan ta haci apelacion na e mayornan cu ta na altura di un hoben cu lo ta ideal pa e forma parti di e trayecto aki, pa bin mas pronto posibel na Marinierskazerne pa inscribi y asina cuminsa mas pronto posibel cu e proceso di seleccion. Lo mester haci varios test, prome cu scoge un grupo. Un test hopi importante, t’e test medico. Pero tambe lo tin un test fisico y tambe un rond di combersacion pa asina nan por siña conoce e hoben un poco mas di acerca, p’asina ora cu e grupo cuminsa na maart, ay caba tin tur informacion necesario di e hobennan pa cuminsa cu e grupo.
