Minister di Asuntonan Economico mr. Geoffrey Wever, a baha for di avion na Hulanda y di biaha e tabatin reunion programa. E prome cita tabata cu PRIVA, cu ta un empresa cu ta ofrece solucionnan innovativo pa control di clima sostenibel y maneho di proveso den horticultura, tanto pa e cultivo paden of den aire liber.
PRIVA ta situa den Lier, na Delft. Nan ta specialisa den trahamento di greenhouse, maneho eficiente di awa y coriente den e proceduranan di agricultura y horticultura. E mandatario a haya un invitacion pa un presentacion riba nan operacion.
E compania ta traha na mas di 100 pais, trahando cu empresarionan internacional. “Nos a intercambia di idea con nan por yuda nos pa sigui desaroya agricultura comercial na Aruba.”
Loke ta importante di e bishita aki ta pa mira e tecnologianan moderno cu por yuda yega na un proceso mas eficiente den Agricultura cu na final lo haci e productonan mas competitivo. E mercado di Aruba y Hulanda ta diferente, principalmente pa loke ta clima. Sinembargo di loke a bini dilanti por a compronde cu PRIVA tin experencia cu diferente tipo di clima.
Durante e reunion a papia riba esey, pero tambe e posibilidad cu nan lo por yuda Aruba cu un parke innovativo di greenhouses pa agricultura comercial. Mester di un diseño cu ta cumpli cu loke Aruba por atende y ta factibel. E mandatario a menciona cu p.e. e coriente ta un problema y pa esaki mester pensa for di inicio riba alternativanan. Pues un diseño unda tur infrastructura ta cla for di inicio y PRIVA a mustra di a realisa proyectonan asina na otro paisnan caba, manera na Singapore.
A intercambia di pensamento y na final a dicidi cu lo formula kico ta e siguiente reunionnan pa e pensamento di yega na un parke innovativo na Aruba. Tin idea unda esaki por tuma luga na Aruba, pero no ta cla pa divulga tur detaye.
