Despues di a haci un tremendo papel na Republica Dominicana, e seleccionnan di U15 mucha homber y U14 mucha muhe, a yega Aruba. A ricibi nan cu tur honor for di momento cu e avion a baha, te ora cu nan a coy nan maleta y a bin pafo di e sala di yegada di aeropuerto internacional Reina Beatrix, unda cu un cantidad grandi di persona a ricibi nan.
E futbolistanan femenino U14 a sali campeon y e mucha hombernan U15 a sali subcampeon den e torneo CFU Challenge Series (Caribbean Football Union). Ambos ekipo a sa di demostra disciplina y determinacion riba nan wega durante di e torneo aki.
Famia, amigo y conoci a bin mustra nan apoyo y duna nan un caluroso bonbini despues di un bon trabao haci den exterior. Esaki sigur ta un logro historico pa nos pais.
Mildred Wever, representante di AVB a comenta cu e emocionnan ta halto. Feliz cu por a logra coy campeon den damas y subcampeon den cabayero. Ta prome biaha den historia di Aruba cu esaki. Pa Wever, ta mas cu un placer y honor di por tabata hefe di delegacion di ambos seleccion di Aruba.
Siguiente paso ta pa sigui cu training pa tanto mucha muhe como mucha homber pa por sigui desaroya nan mes.
David Abdul, como coach di e mucha hombernan, a conta cu esaki tabata un bon experiencia los di e resultado. E hobennan a haci un tremendo papel riba tereno, aunke cu ta jammer cu nan no a por a coy e prome luga. Pa ta subcampeon den un torneo den e torneo aki ta un bon logro. Tabatin bon comentario pa e ekipo caminda cu a cataloga nan como esunnan di mas rustig y disciplina.
Pa loke ta e nivel di competitividad den e region ta birando mas grandi. Aruba sigur ta biniendo bek riba mapa y ta un bon trabao di parti di e preparacion. Awo cu e AVB Academy e muchanan ta train y sigur ta treciendo su frutanan.
Aworaki tin tur e diferente categoria ta den training y proximamente lo cuminsa bek. Intencion ta pa competi contra tur division, manera cu a sosode na Republica Dominicana.
Randolf Lacle, como presidente di AVB, a comenta cu esaki ta prome biaha cu e mucha muhenan a participa den e categoria aki den un torneo internacional.
E futbol cu nan a desplega a sorprende tur hende den un forma positivo. Por a mira e alegria tambe cu tabatin ayera unda tur caminda, tur hende ta bezig ta mira e mucha muhenan aki hunga futbol. Ta claramente un señal cu futbol femenino tin un bunita futuro aki na Aruba.
Pa loke ta e mucha hombernan, cada aña ta mehora den torneo. Tabatin un rival fuerte den Boneiro. Nan no a logra, pero sigur den e siguiente edicion e mucha hombernan lo bay cu e titulo.
