Te ainda ningun hende no ta papia di esaki, pero pa varios aña alcohol a bin ta mata hende y destrui hopi famia, causando hopi daño na comunidad accidente y morto den trafico, hende invalido, violencia domestico, problema grandi bao di hubentud y un cantidad di malesa.
E ta un gran negoshi, casi na cada skina di caya bo por haya un bar, p’asina hende por sigui bebe, tur sorto di bebida hende ta bebe. A bin sali na cla cu hopi no por sin alcohol. Alcohol tin un dominio hopi grandi riba nan bida.
Hende grandi ta siña mucha bebe y tin hopi mucha bao di edad ta bebe y hopi cu ta bay scol ta bebe. Alcohol ta un droga, alcohol ta un demoño cu ta gara bo pa e destrui bo. Hopi hende a pensa cu nan por caba cu alcohol, pero alcohol a caba cu nan.
Tin hopi hende muher ta bebe. Hopi hende ta bisa cu nan ta bebe pa motibo di depresion y otro tipo di problema. Pero alcohol no ta yuda bo sali fo’i problema. Al contrario, e ta hinca bo den mas problema.
Cua ta e vacuna contra alcohol?
Awel tin un solucion y esey ta Dios y disciplina, Dios por libra bo di alcohol y bo disciplina por mantene bo leu for di alcohol. Pero prome cu tur cos bo mester pidi Dios pa libera bo di alcohol, prome cu alcohol destrui bo bida. Pasobra alcohol ta haci bo contento, p’asina e tin gara riba bo y domina bo cu tur consecuensia negativo. Pasobra no tin positivismo pa un hende domina pa alcohol.
Proverbio 23:35 ta splica bon cla kico alcohol ta haci cu hende: “Lo bo bisa: Nan a dal mi, ma mi no a sinti, nan a bati mi, ma mi no tabata sa mes ki ora lo mi spierta. E ora ey lo mi ta bolbe busca mas.
Asina ta pasando cu hopi hende, cu ta burachi bao di stuur, kende ta bebe durante di ora di trabao y cu tur dia ta yega cas burachi y asina perde control y autoridad riba nan hoga y famia.
Proverbio 20:1 ta bisa: “Biña ta un hacido di bofon, bebida sterki ta un borotado y esun cu ta bao di su influencia no ta sabi.
Alcohol ta haci hende sabi bira bobo. Alcohol ta causa malesa di higra, Cancer na Stoma of otro tipo di cancer. Alcohol ta afecta tur organo di bo curpa. Alcohol ta pone bo perde respet pa bo mes y pa tur otro hende.
Juan 10:10: “E ladron a bin pa horta, mata y pa destrui. Ami a bin pa nan tin bida y pa nan tin e na abundancia.”
E decision ta den bo mes man pasobra abo ta dicidi riba bo bida. Pero un hende no por ta terco, y cabesura pa su mes destruccion.
P’esey awe nos ta invita cualkier persona cu por ta mara na alcohol, pa e por entrega su bida na Cristo Hesus y E mes lo libra bo di e adiccion aki.
