| Diaranson anochi gobierno hunto cu Crisis Team a informa di e cambionan den e lista di medidanan relaciona cu Covid-19. E intencion ta pa baha e casonan di COVID-19, pero esaki a trece mal comprendimento. Ofo Escudero, presidente di Aruba Entertainment 2020 (AE) no ta di acuerdo loke AHATA a trece dilanti. AHATA a manda un email na su miembronan pa loke ta e ultimo informe di e conferencia di prensa. Pa AE loke e asociacion a informa su miembronan no ta cuadra. E asociacion a bisa e miembronan cu e medidanan cu a bin cu ne ta drenta na vigor entrante awe te cu 31 di januari ta corecto, pero e informacion cu “no por tin musica of entretenimento, no por tin eventonan musical cu ta atrae aglomeracion. Solamente “background music” den e restaurant y no por tin bailamento.” Segun AE, esey no ta cuadra completo. Den e afkondingsblad van Aruba di e Ministeriële Regeling di dia 6 januari ultimo, riba pagina 17, articulo 3.5.2 ta poni claramente cu por tin musica y solamente un (1) musico y por toca solamente background music. E nivel di sonido no por pasa e 70 dB. “Nos ta papia den nomber di tur cu ta traha den e industria di entretenimento riba e isla, miembronan di Aruba Entertainment 2020, ora nos bisa, nos ta urgi AHATA pa rectifica y pa aclaria e mal comprendimento di e carta manda na e miembronan,” asina Ofo Escudero a indica. Door di esaki ta pone e trabou di e miembronan di AE na peliger. |
