Diabierna Corte den Prome Instancia di Aruba a trata e caso contra di Stephen Wilson, cu tabata e chauffeur cu a causa e accidente fatal cu a costa bida di tres persona di biaha.
E caso aki a sosode dia 2 di october 2022 den Colony. Den corte tabata tin varios famia presente pa sigui e caso aki. Abogado defensor, mr. Peter Mohammed a bisa cu su cliente tin hopi duele di loke a pasa. El a bisa cu banda di storia di su cliente ta bisa cu e mester a kita pa un auto cu tabata bin for di direccion contrario. Y door di esey el a slip baha di caminda y ora di subi bek, el a bay dal directamente den auto di e victimanan.
ALCOHOL
mr. Mohammed a bisa cu polis a laga Wilson supla y el a supla net n’e rand di 220mg. Segun e abogado, Ministerio publico a Sali for di e punto di bista cu e accidente lo tabata causa door di exceso di alcohol. Pero for di investigacion a sali na cla, cu net prome cu e accidente, el a uza listerine, cual ta haci cu e mg a sali asina halto, door cu ainda e tabata tin listerine den su boca cu ta trigger e blaasapparaat p’e Sali hopi mas halto, na 287mg. Di tur manera, a saca un muestra di sanger for di Wilson cu a mand’e Hulanda pa NFI (Nederlands Forensisch Instituut) y resultado a indica cu e no tabata tin rastro di alcohol den su sistema. Pero esaki ta nifica cu e por tin alcohol, pero no riba 220mg.
DEFENSA
Parti di su defensa cu el a hiba ta cu no por acus’e di tabata core auto bou di influencia, cual ta forma parti di e rekisitorio (Fiscal ta trece dilanti e echonan di caso, su opinion y basa riba esaki ta exigi un castigo). E punto di bista di fiscal ta cu a manda e speedometer (computer di e auto) pa Hulanda, na NFI, unda cu nan a haci un raportahe riba dje. Segun e rapport aki, e por a core entre 106 y 126 kilometer pa ora. Pero a haci e calculacionnan aki basa riba e potretnan di e accidente, basa riba tur e midinan cu e Departamento Forensico di Trafico a haci. Pero segun fiscal, por sali for di e punto di bista cu NFI su indicacion di speed tabata asina halto y p’esey e ta castigabel.
Pero di otro banda, mr. Mohammed a sigui bisa, si core c’un speed di 110-120 kilometer pa ora, sali for di caminda, den e mondinan, no tin manera pa un auto por bin bek riba caminda cu e mesun velocidad di 120 kilometer y dal den un otro auto. Sinembargo esey ta algo cu hues lo mester dicidi y kico e ta haya cu tin pa substancia tur e acusacionnan pa duna sentencia.
Fiscal a pidi 3 aña, ya cu e Ministerio Publico ta haya cu el a core iresponsabel bou di influencia di alcohol. Pero si esaki no ta e caso, e castigo mester ta mas abou.
