Diabierna merdia Corte di Prome Instancia a dicta sentencia den e Caso Flor, den cual yiunan di dos politico prominente di nos isla ta involucra. Ta trata di e caso contra Nigel Williams, Chris Willems , Kevin Wever y Yowalfre Torres Mendez. Ta acusa nan di destruccion y violencia publico.
SENTENCIA
Den caso di Chris Williams, hues a sentencie na dos siman di prizon condicional, c’un periodo di prueba di dos aña, kitando e tempo cu el a sinta caba, cu ta un dia (ta kita dos ora). E lo mester traha pa comunidad pa un total di 120 ora. Den caso cu e no cumpli cu esaki, e lo mester bay cera pa 60 dia.
Den caso di Nigel Williams, hues a tene cuenta cu e daño cu el a ocasiona pa cual a dun’e un castigo di un luna condicional, kitando e tempo cu el a sinta caba cu ta cinco dia (kita 3 ora for di dje). E lo mester haci trabou pa comunidad pa 160 ora. Si acaso e no cumpli cu esaki, e lo mester bay 80 dia cera.
Den caso di Yowalfre Torres Mendez, el a haya un castigo di dos luna condicional, kitando e tempo cu el a pasa den detencion preventivo. Tambe e lo mester cumpli cu 180 ora di trabou pa comunidad. Den caso cu e no cumpli cu esaki, e lo mester bay cera pa 90 dia. Ademas, tabatin un peticion di daño y perhuicio contra di dje, pa a herida e coki di e restaurant, na un suma di 13 mil florin. Pero hues a otorga e pago di e suma di 3500 florin na daño.
Pa loke ta trata Kevin Wever, hues a sentencie na un castigo di 40 ora di trabou pa comunidad, kitando dos ora cu e tabata cera pa investigacion. Den caso cu e no cumpli cu e sentencia, e lo mester bay 20 dia cera. Hues no a dun’e tempo di prueba.
