Despues cu e Movimento RAIZ a lansa diasabra ultimo su Cultivando Tour – Anochi Informativo na Centro di Bario Savaneta awor ta toca turno na e bario di Piedra Plat.
Esnan presente y esnan cu por a sigi e encuentro live via Facebook diasabra ultimo a reacciona positivamente riba e vision di e ekipo hoben di RAIZ. Por a nota cu hopi tabata contento di a tende kiko RAIZ ta para pe y cu porfin tin un aire nobo di speranza pa nos dushi pida baranca. Team RAIZ kier a infatisa cu e Movimento aki ta di Pueblo. Y e unico manera pa por logra haci e cambio tan anhela pa nos tur ta door di uni nos Pais. RAIZ kier a invita tur esnan di Piedra Plat y besindario pa acudi diaranson awor na Centro di Bario Piedra Plat cu ta localisa banda di Compleho Deportivo Franklyn Bareño 7:30pm. E Anochi informativo aki lo dura te cu 9:30pm. Aki esnan presente lo tin oportunidad di duna nan commentario y feedback pa esnan di Movimento RAIZ. “Nos ta contento con e prome anochi informativo den bario di Savaneta a bai. Esaki ta nos di dos stop di e Tour.
Poco poco nos lo ta bishitando tur bario y asina trece nos mensaje y vision” lider di Movimento Raiz Ursell Arends a cuminsa ta bisa. “Hopi di nos ta anhela e cambio real, unico manera pa logra esaki ta cu nos como pueblo mester uni y lansa un “disruption” politico. Aruba ta di nos tur. Anto esey ta full e idea di e movimento RAIZ”. Duranto e anochi infomativo aki fundadornan di e Movimento lo splica ampliamente dicon e movimento a ser funda y kiko ta e intencion tras di esaki. Banda di esaki manera menciona tin oportunidad pa papia directamente cu e dirigente nan y asina trece bo precupacion dilanti. Si bo persona tambe kier planta un simia y asina cambia e rumbo di nos dushi pida baranca cu yama Aruba pa un mihor futuro sigur bo no mag perde e anochi aki Keda altanto di Movimento RAIZ door di like nan Facebook Page RAIZ Aruba y muy pronto tambe via nan website www.raizaruba.com
