Awe dialuna anochi a transporta e motociclista Elysee Jean di 21 aña di edad cu Air Ambulance pa Colombia. Ey Dokternan lo mester atende cune y purba brind’e cuido specialisa pa e cantidad di complicacionnan cu el a sufri despues di a dal den un auto cu su cara durante un pleno persecucion policial dialuna siman pasa den oranan di marduga. Su condicion a keda delicado y ta rekeri hospitalisacion na un centro specialisa pa brinda e tipo di cuidonan asina.
Famia a conta nos cu a dura largo prome cu AZV por a caba di manda e victima pa tratamento specialisa na Colombia pasobra su paspoort a caduca. Mester a busca un “nood paspoort” via Consul Honorario di Haiti, cu tambe mester a regla un ke otro cu Haiti mes, prome cu por a regla pa un Air Ambulance sali di Bogota pa bin busca e pashent na Aruba. E procedura diplomatico aki a dura un poco mas di locual a spera na un prome instante.
Pa loke ta e investigacion mes, Altocomisario Andrew Hoo a tene un tipo di “discurso nacional” ayera, un berdadero novum pa un hefe di Polis, despues di avalancha di critica di parti di amigonan di e victima y publico engeneral cu no a mira e motibo cu Polis ta persigui un hoben riba scooter di e forma aki den oranan di marduga, treciendo bida di e Polisnan na peliger, di esun cu ta core pa Polis y di otro inocentenan riba caminda. Altocomisario Hoo a indica cu a start un investigacion pero no kier bisa cu ta investigando e Polis cu ta tras di e persecucion aki. Di otro banda el a adverti tur cu ta menasando Polis cu no ta acepta e practica aki y lo actua contra tur!
Famia mientrastanto no a para mannan crusa. Mientras Cuerpo Policial ta purba di tur forma pa desvia e criticanan den nan contra, e famia di e victima a acerca abogado mr. Rossi Marchena pa defende interes y derechonan di e victima. Nan ta consciente cu core pa Polis no ta bon! Pero e forma aki di reacciona mescos cu ta un atracado e hoben ta y despues maltrat’e siendo e ta malamente herida benta na suela ta un hecho castigabel pa ley, na opinion di famia di e hoben naci na Haiti.
E condicion di e motociclista ta serio. Segun su famia, e tin varios fractura den su curpa, mientras cu e sla principal ta na su cara. Ta hasta teme cu e por perde un banda di wowo. Ta papia cu mester reconstrui henter su kaak y cu posiblemente e lo perde su djientenan. Obviamente esaki ta e risico cu e mes a scoge dor di core y neglisha un ordo di Polis pa para e vehiculo.
E victima encuestion no tin yiu ainda, ta biba den Rondweg na Dakota y ta traha cu un contratista pa DOW. Parce cu el a caba di cumpra e scooter algun dia prome y no tin helm. Como Polis a dune ordo pa para pasobra e no tabatin helm bisti, el a opta pa purba scapa di nan pa evita cu ta kita su forma pa yega su trabou. Un mal decision cu awor a caus’e su salud. Asina mes famia ta convenci cu e forma di persigui di Polis ta robes y e abuso despues pio, pa cual nan ta convenci cu Hues lo duna nan rason den e caso penal-civil cu nan lo encamina contra e Polis Wester y tur otro envolvi.
