Cantante bou nomber di “MTCHLL” conoci como Mitchell Tromp, a saca un tema nobo hunto cu Grupo di Betico!
Manera mayoria hende por corda cu MTCHLL su tata Mickel S. Tromp a fayece inesperadamente ariba 9 di Juni ultimo, na un edad jong di 50 aña. Esaki naturalmente tabata y ainda ta un sla tremendo pa MTCHLL y su famia. E cancion nobo titula ‘Tanten Mi Tin Rosea’ a nace di un inspiracion directamente for di e perdida grandi aki.
Mickel S. Tromp semper tabata un persona sumamente alegre, positivo, cariñoso y amabel. Den su 28 añanan como bombero el a sa di salba por lo menos 9 bida, entre otro den accident nan di auto, banda di lama y asina por sigui menciona. Tambe el a traha den e rescue team despues di horcan tanto na Aruba como na Sint Maarten. Su trabow tabata algo cu e tabata sumamente orguyoso di dj’e. Defunto Mickel tabata conoci como un futbolista di taya cu a hunga pa su team di bario Bubali Sport Club ; Zaalvoetbal pa Fermin’s Boys y den e Seleccion di Aruba y Antillas Hulandes na varios ocacion (Puerto Rico, Venezuela, Surnam, Guyana y Korsow). E tabata un deportista di curason y a purba varios otro deporte manera Billjard, Soft Ball, Bolas Criollas y hopi mas.
Den musica el a actua hopi aña como DJ, a toca y canta den Banda S.E.D. cu ta uno cu nan a lanta bou remise di Kazerne na Brandweer. Ela participa basta aña den Carnaval cu su grupo stima OPC y tawata stima nos cultura di musica crioyo. Tanto asina cu e diadomingo prome cu el a fayece e tabata bailando ariba tononan di Grupo di Betico den cas cu un alegria inmenso. Sin sa cu lo ta su ultimo baila den e bida aki. Di akinan e deseo di su yui pa dune un cantica pe keda baila eternamente aya serca Papa Dios !
Awe MTCHLL kier honra su Tata pa ken e tabata na bida y pesey a opta pa no dedica un cancion tristo na dj’e sino un cancion cu ta describi su persona manera nos tur kier keda cord’e.
E letra y melodia componi pa Jaderick Croes y Miguel Genser a produci e tema. E mixing and mastering a keda den man di Gilner Dirksen y e music video den man di Dani Cruz.
