Ta un echo cu un persona indocumenta cu bira malo na Aruba, no por nenge ayudo medico. Si ta malesanan grave, e lo haya e tratamento adecuado na e clinicanan den exterior cu cual Aruba tin un relacion di trabou. Esaki ta loke cu e director di AZV ir. Edwin Jacobs a duna di conoce.
Recientemente mes tabatin un caso unda un señora publicamente a pidi pa ayudo, pa motibo cu e tin un malesa grave. Un malesa pa cual el a keda varios tempo interna den hospital. E señora aki a mustra un recibo di algun shen mil florin cu el a ricibi for di hospital.
Den cuadro di esaki, Jacobs a splica cu tin servicio adicional cu AZV ta brinda na gobierno, cu nan ta paga despues. No ta paga e servicionan aki for di e entrada cu ta haya for di BAZV, e director di AZV a enfatisa bisando. Gobierno ta haya un cobransa apart y ta haci e pago.
Tambe AZV ta administra e seguro adicional cu gobierno publico tin pa su empleadonan y esunnan considera igual na empleado publico. Aña pasa e post aki tabata 4.3 miyon florin y debidamente a paga AZV.
E otro ta e servicio cu ta brinda na Ministerio di Husticia. Personanan na Aruba cu no tin e documentonan necesario y bira malo, ta haya e tratamento medico. Si nan bida ta na peligro y no por duna e cuido aki na Aruba, AZV ta facilita via di e clinicanan den exterior pa e persona haya e tratamento necesario. Ta manda e cobransa aki apart pa Ministerio di Husticia. E post aki aña pasa a costa Ministerio di Husticia 462 mil florin.
Esey ta unico cos cu AZV sa di e grupo di indocumenta, y no sa nada di ki otro gastonan nan ta nifica pa gobierno.
