Minister Ursell Arends, encarga cu proteccion di naturalesa, ta extende un invitacion na studiantenan di Universidad di Aruba pa participa den un consulta tocante e concepto di ley pa Derecho di Naturalesa. E evento aki lo tuma luga den e Aula di Universidad di Aruba dia 18 di april 2024, for di 10’or di mainta te cu 12’or di merdia.
E introduccion di Derecho di Naturalesa den nos constitucion lo marca un momento significante den e lucha pa reconoce y protege e derecho fundamental di naturalesa pa existi, prospera, y regenera su vitalidad. E serie di sesionnan di consulta, cual a inicia dos siman pasa na MFA Savaneta y Paradera, a demostra e dedicacion pa inclui e bos di e comunidad en general, gremionan comercial, abogado, y hues den e proceso di desaroyo di e ley.
E sesionnan a tuma luga en colaboracion cu Directie Natuur en Milieu y a inclui discusion detaya di cada articulo di e proposicion di ley. E enfoke tabata riba dialogo abierto y coleccion di feedback constructivo, cu Minister Arends poniendo enfasis riba e importancia pa inclui un perspectiva amplio di punto di bista y necesidadnan den e ley final.
Ademas, e proceso di consulta lo sigui online, permitiendo esnan interesa pa revisa e propuesta di ley y comparti nan opinion y sugerencianan pa medio di e formulario disponibel riba www.publico.aw/consulta/ . E feedback colecta lo yuda duna forma na un ley mas robusto y efectivo.
Pa garantisa participacion amplio y transparencia, e fecha final pa entrega di feedback a ser extendi te cu 21 di april 2024, ofreciendo mas tempo pa comunidad por contribui na e proceso legislativo. E fecha aki ta simbolico, ya cu e ta un dia prome cu Dia di Mama Tera y ta conmemora exactamente un aña desde cu e inicativa pa e ley aki a ser entrega na Departamento di Legislacion y Asunto Huridico (DJWZ).
Universidad di Aruba ta un simbolo di conocemento na nos Pais y pa es motibo a scohe Universidad di Aruba como anfitrion pa e ultimo consulta publico pa cu Derecho di Naturalesa. Ministerio di Naturalesa ta agradecido pa e apoyo y contribucion continuo di tur stakeholder, miembronan di comunidad di Aruba y tambe esunnan internacional cu a mustra interes den Aruba su compromiso pa traha den un manera transparente y colaborativo y logra e metanan di proteccion di naturalesa.
