Durante siman cu a pasa, Minister Ursell Arends a reuni cu e representantenan di e piscadonan di harpoen pa loke ta trata nan colaboracion pa yega na un maneho di spearfishing nobo.
Ya caba pa varios siman, ministerio di naturalesa ta atendiendo diferente reunion unda tin intercambio di conocemento y tambe ta trece cierto proposicion dilanti, pa asina yega na un maneho unda e practica di tira pisca y conservacion di naturalesa por ta den balanse harmonioso.
Pa cu e reunion a invita diferente departamento concerni pa ta presente, entre otro DLVV (Santa Rosa), DNM (Directie Natuur & Milieu) FPNA (Fundacion Parke Nacional Aruba) y Kustwacht. Involucrando e stakeholdernan cu ta atende directamente cu e practica y efecto di spearfishing, ta garantisa esfuerso conhunto pa yega na un maneho definitivo cu lo mester wordo regula por medio di ley y pa asina percura cu spearfishing por tuma luga na un forma controla, regula y sostenibel.
Ministerio di naturalesa lo continua cu e reunionnan den e proximo simannan, unda lo sigui delinea entre otro e proceso di permiso y regla di practica, pa asina pronto anuncia e maneho.
Minister Arends ta gradici tur stakeholder y specialmente e grupo di piscado di harpoen cu ta acudi na e reunionnan aki y ta brinda nan conocemento y experiencia cu ta aporta na discuscion sano y constructivo, cu enfoke riba metanan comun.
