Recientemente tabatin un anochi special p’e studiantenan di American University School of Medicine, caminda cu como parlamentario y ex-Minister di Enseñanza, a invita drs. Marisol Lopez-Tromp pa nan “White Coat Ceremony 2022”. Esaki ta e momento cu e studiante, pa prome biaha, ta bisti nan bachi blanco di futuro dokter.
Durante e anochi diferente orador a hiba palabra, manera entre otro director di dr. Horacio E. Oduber Hospital, esta Jacco Vroegop, cu a stimula e studiantenan pa enfoca riba nan futuro y corda kico cu nan funcion ta, e parti humano ta loke ta haci nan hende y un bon dokter. Tambe cu nan mester corda semper cu nan mester traha como un team y cu e anochi aki ta manera e comienso di e resto di nan bida profesional.
Despues e studiantenan a ricibi nan bachi blanco cu ta e parti mas importante di henter e anochi. “Na final di e anochi a invita mi pa subi e escenario caminda mi a ricibi un bunita recuerdo di nan parti. Mi ta desea e studiantenan cu a ricibi nan White Coat hopi exito den nan carera medico”, asina Parlamentario drs. Marisol Lopez-Tromp a duna di conoce.
Tempo cu e scol di medicina Mericano a bin establece na Aruba, ta Marisol Lopez-Tromp tabata Minister di Enseñansa. E scol a reconoce esaki durante nan evento e aña aki.
Particular na e potretnan cu a sali despues tabata pa mira e contrincantenan politico di MEP y MAS sinta na e mesun mesa. Parce cu e organisado a “setup” e evento di tal forma cu a pone dignatarionan hunto. Pero hasta ex-abogado mr. Hendrik Croes (tata di minister-president) tabata sinta na e mesa di honor. “Esey ta pasobra e scol a cumpra of ta cumprando Arulex Building di famia Croes na Eagle”, asina un fuente di AUSOMA INTERNATIONAL EDUCATION CENTER VBA a sigura na nos. “Esey ta splica tur cos”, a sigura na nos.
American University School of Medicine Aruba ta situa awendia den Wilhelminastraat. Nan cursonan ta varia entre cuater pa cinco aña. Studiante mester paga pa semester pero na final lo costa entre $ 91,400 pa $107,400. Parti di e programa ta na Aruba y otro (rotacion) na Merca. Kanaan Baroud ta na cabes di e organisacion local.
