Dialuna mainta a habri oraño riba nos isla. Caminda nan decora cu bandera di Hulanda y tur cos cla pa yegada di Famia Real riba nos isla. El a tuma basta luna di preparacion pa por tin e famia riba nos isla. Algo prome cu 11:00 am e avion gubernamental di Hulanda, PH-GOV a aterisa riba nos isla. Abordo tabata S.A.R. Rey Willem Alexander, hunto cu Reina Maxima y Prinses Amalia. Tambe, secretario di estado, drs. Alexandra van Huffelen ta compaña nan durante nan bishita den Caribe Hulandes.
Locual a capta hopi atencion dialuna mainta ta cu dump tabata na candela. E avion a yega y parti paseit tabatin huma preto ta sali. E problematica di dump ta algo cu ainda no ta mustra resolvi. Recien hasta, ex-minister Otmar Oduber a comenta riba e situacion aki caminda tabata medio haci bofon di Minister Ursell Arends, caminda cu ta broma cu a cera dump pero di otro banda dies otro a habri.
A logra haya un reaccion exclusivo di prome minister mr. Evelyn Wever-Croes. E mandatario mas importante di nos pais ta lamenta e echo aki. El a comenta cu a cende e dump intencionalmente na candela. A cende tres parti di dump na candela p’asina mustra e parti mahos di nos isla. No ta tur hende por mustra nan banda bunita, segun minister presidente. Di nan banda como gobierno, a splica famia real riba e problematica aki.
