Minister di Infrastructura, Otmar Oduber awe a confirma den un conferencia di prensa cu el a instrui Director di DIP pa e conduci un investigacion interno y pa entrega un keho simultaneamente na Ministerio Publico relaciona cu e varios denuncianan publico cu victimanan di e sospechoso di estafa, Leoncio Corona, a haci via e media mas grandi di Aruba, 24ora.com. Minister a admiti dilanti prensa cu e tambe a mira e entrevista riba 24ora.com di Maikel Rodriguez, den cual e ta acusa Corona di a hort’e como 20 mil florin pa e regla tereno y kiosco.
Minister a bisa di a instrui Director di DIP pa investiga e asunto aki profundamente, den cual hendenan cu no ta traha na DIP, ta soborna y estafa ciudadanonan cu promesanan relaciona cu tereno y kiosco.
Obviamente e mandatario tabata masha disgusta awe mainta den e conferencia di prensa y sigur no contento cu 24ora.com a habri espacio pa e ciudadano por a expresa su disgusto y haci su denuncia. Awor cu Maikel Rodriguez a bin afo cu prueba den man, e miho forma ta pa laga husticia investiga.
Specialmente pasobra Leoncio Corona a saca un combersacion telefonico di dje cu Minister Otmar Oduber unda e mandatario ta papia di a instrui su coordinador pa atende e asunto cu DIP mas lihe posibel. Esey Corona a laga Rodriguez scucha y cu pueblo por a mira riba e video, pa e haci comosifuera cu e Minister ta yudand’e cu e tereno aki. Claro cu esey ta implica e mandatario y ta motibo suficiente pa Landsrecherche start un “vooronderzoek” pa verifica si tin base pa un investigacion completo.
Minister Oduber a sigura cu e sa di e “voicenote” ey pero cu esey tabata pa un tereno na Fontein di un famia Arubiano cu ta atendiendo un ke otro cu DIP. E pregunta ta e ora ey: Ki mishi Leoncio Corona cu e voicenote ey? E ta intermediario pa e Minister den traspaso di e tereno di Fontein pa Gobierno of vice versa? E tin un compania di Real Estate? Dicon Minister ta manda semehante voicenote asina pa e homber aki?
Tabata mas cu obvio cu a descubri e mandatario aki den un asunto masha incomodo pe y pa su futuro politico. Specialmente pasobra mas hende a sali afor awor acusando e mesun Leoncio Corona di mas caso di estafa y tur den e mesun forma. Si e no ta traha pa e Minister, ta dicon ta mande Voicenotenan asina anto primintiendo di lo regla terenonan pe cu el a cobra otronan pa regla? Ta preguntanan cu merece un contesta sincero pasobra e caso aki ta hole na un investigacion di #terenogate cu por hinca mas hende den problema.
